Almatyda kóńil kóterý úshin kólik urlaǵan jas jigitter ustaldy
ALMATY. QazAqparat – Almatyda kóńil kóterý úshin bóten avtokólikterdi aıdap ketken 18 jastaǵy eki jigit ustaldy, dep habarlaıdy QazAqparat tilshisi.
Almaty qalalyq polıtsııa departamentiniń habarlaýynsha, Almaty oblysynyń on segiz jastaǵy eki turǵyny jolda jarysyp, drıft uıymdastyryp, bóten kólikterdi ádeıi buzǵan. Ekeýiniń de júrgizýshi kýáligi joq.
Sonymen qatar, kúdiktiler kólikti kilt tańdap nemese buraýysh arqyly ashqan. Olar urlanǵan kólikpen adam az júretin jerlerde jarysyp, drıft jasaǵan. Kóńil kóterip bolǵan soń kólikterdi jol jıegine qaldyryp ketken.
«Almatyda ustalǵan azamattardyń bóten kólik quraldaryn zańsyz ıemdený faktisine qatysy bary dáleldendi. Endi olar QR QK 200-babyna sáıkes qylmystyq jaýapkershilikke tartylady. Olardyń basqa da qylmystarǵa qatysty bar-joǵy anyqtalyp jatyr», - dedi Almaty qalalyq krımınaldyq polıtsııa basqarmasynyń bastyǵy Janbolat Zıadın.
