Almatyda qonaqúı, qoǵamdyq tamaqtaný jáne dinı oryndar kezeń-kezeńmen ashylady
ALMATY. QazAqparat – Almaty qalasyndaǵy qoǵamdyq tamaqtaný, ǵıbadat etý jáne qonaq úı keshenderiniń nysandaryna qoıylǵan shekteý sharalary qaladaǵy epıdemıologııalyq jaǵdaıǵa baılanysty kezeń-kezeńmen alynatyn bolady, dep habarlaıdy QazAqparat tilshisi.
«Qoǵamdyq tamaqtaný jáne qonaq úı keshenderiniń nysandaryn iske qosýǵa qatysty daıyndyq jumystary boıynsha megapolıstiń bıznes qaýymdastyǵymen birlesip, atalǵan sektorlardyń uıymdaryn sanıtarııalyq-epıdemıologııalyq talaptar saqtalǵan jaǵdaıda, 25 mamyrdan bastap kezeń-kezeńmen iske qosý máselesi talqylanyp jatyr», - dep habarlady ákimdik.
Qala ákimdigi Almatyda táýekel toptaryn jappaı testileý jáne ınfektsııanyń jasyryn oshaqtaryn anyqtaý boıynsha jumystarynyń jalǵasyp jatqan eskere otyryp dinı ǵımarattarǵa (meshit, shirkeý, ǵıbadathana, sınagoga jáne t.b.) barýǵa shekteýdi 18 mamyrdan bastap alýǵa áli erte ekenin atap ótti.
«Almaty qalasyndaǵy ǵıbadat etý oryndarynyń qyzmetin qaıta jalǵastyrý jáne qalalyqtardyń olarǵa barýyna shekteýdi sanıtarlyq-epıdemıologııalyq talaptar saqtalǵan jaǵdaıda, 2020 jylǵy 25 mamyrdan bastap kezeń kezeńmen alyp tastaý josparlanyp otyr», - delingen habarlamada.
Barlyq iske qosylatyn nysandar jańa usynymdarǵa: áleýmettik qashyqtyq, jumys oryndaryndaǵy qatań sanıtarlyq rejım jáne t.b. talaptarǵa sáıkes jumys isteýge mindetti. Bul rette, jumys oryndaryna tikeleı qajetti jumysshylar sanyn atalǵan uıymdardyń basshylary ózderi belgileıdi.
