Almatyda kommýnaldyq tólemderdi tóleý keıinge shegerildi

Bul týraly Almaty qalasy Turǵyn úı saıasaty basqarma basshysynyń orynbasary Meıirjan Otynshıev brıfıngte aıtty, dep habarlaıdy QazAqparat tilshisi.

Onyń aıtýynsha, qala ákimdigi turǵyndardy qoldaý boıynsha birqatar sharalardy qabyldaǵan.

«Sýmen jabdyqtaý jáne sý tartý qyzmetterine («Almaty Sý» MKK), jylý jáne ystyq sýmen jabdyqtaýǵa («Almaty jylý jelileri» JShS) jáne elektr energııasyna («Almatyenergosbyt» JShS), gazben jabdyqtaý («QazTransGaz Aımaq» AQ Almaty óndiristik fılıaly) jáne telefon baılanysyna («Almatytelekom» ATD) tólem jasaýdy keıinge qaldyryldy»,– deıdi ol.

Bul bastamany lıft uıymdary da qoldady. Olar qala turǵyndaryna aıyppul sanktsııalaryn qoldanbaı, eki aıǵa (naýryz, sáýir) tólemdi keıinge qaldyrdy.

«Turǵyn úıdi jóndeý jáne kútip ustaý qorynan aýla sypyrýshylardyń, klınıngtik kompanııalardyń eńbekaqysy, avarııalyq qyzmetterdiń, lıftiler men kótergishter sııaqty qaýipti tehnıkalyq qurylǵylarǵa qyzmet kórsetetin uıymdardyń shaqyrýlary, sondaı-aq kondomınıýmnyń tynys-tirshiligin qamtamasyz etý jáne ortaq múlikti qaýipsiz paıdalaný, onda tıisti tártipti saqtaý, dezınfektsııalyq quraldardy paıdalana otyryp, sanıtarlyq ylǵaldy tazalaý úshin qajetti basqa da shyǵyndar tólenedi»,– deıdi Meıirjan Otynshıev

Sondaı-aq ol, bul rette, basqarý organdaryna tótenshe jaǵdaıdyń qoldanylý kezeńinde jarnalardy keıinge qaldyrýdy kózdeı otyryp, kúrdeli jóndeýge jarnalar júrgizýge múmkindigi joq menshik ıelerine aıyppul sanktsııalaryn qoldanbaýdy usynatynyn aıtty.

«Turǵyn úı-kommýnaldyq sharýashylyǵyn jańǵyrtýdyń memlekettik baǵdarlamasy boıynsha kondomınıým obektisiniń ortaq múlkine kúrdeli jóndeý júrgizý boıynsha qaryzdy óteýge arnalǵan tólemderge qatysty menshik ıeleri de karantın ýaqytynda tólemderdiń merzimin uzarta alady. Tóleý múmkindigi bolmaǵan jaǵdaıda aıyppul sanktsııalary qoldanylmaıdy»,– dedi ol.