Almatyda kómir baǵasy alyp-satarlardyń kesirinen qymbattap otyr - ákimdik
ALMATY. QazAqparat - Almaty qalasynyń Kásipkerlik jáne ındýstrıaldy-ınnovatsııalyq damý basqarmasy megapolıs bazalary 90%-ǵa kómirmen qamtamasyz etilgenin málimdedi, dep habarlaıdy QazAqparat tilshisi.
Almaty qalasy ákimdiginiń baspasóz qyzmeti taratqan málimetke súıensek, Almaty qalasyndaǵy kómir saqtaıtyn 9 baza 90%-ǵa kómirmen qamtamasyz etilgen.
«"Almaty qalasyndaǵy kómir saqtaıtyn 9 bazadaǵy kómir qalany 90 paıyz kómirmen qamtamasyz etedi. Budan basqa, 1,5 myń tonna kómir Almaty qalasyna aǵymdaǵy jyldyń 18 jeltoqsanyna deıin jetkiziledi», delingen habarlamada.
Qalalyq Kásipkerlik jáne ındýstrıaldy-ınnovatsııalyq damý basqarmasynyń habarlaýynsha, qalaǵa aptasyna 2 ret turaqty túrde shamamen 3 myń tonna kómir jetkiziledi. Bul Almaty qalasynda ornalasqan 17 myńǵa jýyq gaz júrgizilmegen úılerdiń qajettiligin jabady.
Qalalyq ákimdik kómir baǵasy alyp-satarlardyń kesirinen tutynýshyǵa jetkenge deıin ózgeretinin jetkizdi.
«Sapasyna baılanysty kómirdiń bir tonnasynyń baǵasy 12,5 myń teńgeden 15 myń teńgege deıin ózgerip otyrady. Budan basqa, kómirdiń baǵasynyń ózgerýine deldaldardyń da baǵasy áser etedi. Qalalyq qorlardaǵy kómirdi negizinen, Almaty oblysynyń aýyldaryna satatyn alyp-satarlar satyp alady», - delingen vedomstvo málimetinde.
