Almatyda kolledj stýdentteriniń shyǵarma jazý baıqaýy ótti
ALMATY. Qazannyń 11-i. QazAqparat /Erbol Turymbetov/ - Búgin Ál-Farabı atyndaǵy QazUÝ-da «Meniń elim - meniń prezıdentim» jáne «10 jyldan keıingi jańa Qazaqstan» taqyryptary boıynsha almatylyq kolledjder stýdentteri arasynda shyǵarma jazý baıqaýy ótti.
Baıqaýdy Qazaqstan gýmanıtarlyq-saıası konıýnktýra ortalyǵy Ál-Farabı atyndaǵy QazUÝ-men birlese uıymdastyryp otyr. Oǵan Almaty qurylys-arhıtektýra kolledji, QazUÝ men «Turan» ýnıversıtetteri kolledjderinen 20-dan astam stýdent qatysty. Sharanyń maqsaty 10 jyldan keıingi jańa Qazaqstanǵa degen jastardyń kózqarastaryn, tyń ıdeıalaryn bilýge baǵyttalǵan.
Baıqaýdyń ashylý rásiminde Qazaqstan gýmanıtarlyq-saıası konıýnktýra ortalyǵynyń 1-inshi vıtse-prezıdenti Nurlan Erimbetov jáne Ál-Farabı atyndaǵy QazUÝ kolledjiniń dırektory Beıbitkúl Kárimova boldy.
«Jastar elimizdiń bolashaǵy bolǵandyqtan árdaıym olardyń pikirin eskerip otyrǵanymyz abzal. Búgingi shyǵarmalar baıqaýy sol aıtqanymyzdaı, keleshekke degen jas býyn ókilderiniń kózqarasyn bildiredi. Baıqaý shyǵarmalaryndaǵy negizgi silteme Elbasynyń halyqqa joldaýlaryna baǵyttalǵan», - deıdi B. Kárimova.
Resmı tilde ótkizilgen konkýrs qorytyndysy boıynsha, QazUÝ kolledjiniń 1-shi kýrs stýdenti Beksultan Danııar jeńimpaz bolyp tanyldy. 2-shi oryndy QazUÝ kolledjiniń 1-shi kýrs stýdenti Qosybaev Jasulan ıelense, 3-shi oryn Almaty qurylys-arhıtektýra kolledjiniń 3-shi kýrs stýdenti Elena Karavanskaıaǵa buıyrdy.
Qazaqstan gýmanıtarlyq-saıası konıýnktýra ortalyǵynyń vıtse-prezıdenti Talǵat Mámiraıymov jeńimpazdarǵa maqtaý gramotalary men estelik syılyqtar tabys etti.
