Almatyda kóliktiń ishinen erlerdiń qol sómkelerin urlaýmen aınalysyp kelgen qylmystyq top quryqtaldy
ASTANA. 25 qańtar. QazAqparat /Aıdar Ospanalıev/ - Almatynyń krımınaldyq polıtsııa qyzmetkerleri avtokólikterdiń salonynan erlerdiń qol sómkesin urlaýmen aınalysyp kelgen Shyǵys Qazaqstan oblysynyń turǵyndarynan quralǵan qylmystyq topty quryqtady.
Bul oqıǵa jóninde búgin jýrnalıstermen bolǵan brıfıngte Іshki ister mınıstrliginiń resmı ókili Nurdildi Oraz málim etti.
Onyń derekterinshe, qylmystyq toptyń 22 jáne 35 jastaǵy eki múshesi ózderi jalǵa alyp, turyp jatqan páterinen ustaldy. Jedel-tergeý amaldary jáne alynǵan aıǵaqtar olardyń avtokólikterge jasalǵan 3 urlyqqa qatysy barlyǵyn kórsetti. Tekserý barysynda málim bolǵanyndaı qylmystyq top ózderiniń jymysqy áreketterin arnaıy stsenarıı boıynsha júrgizgen. Olardyń biri nysanǵa alynǵan adamnyń nazaryn aýdaryp turǵanda, ekinshisi kóliktiń dóńgelegin tesip otyrǵan.
«Al kólik ıesi dóńgelekpen aınalysyp júrgende kóliktiń ishindegi zattar qoldy bolady. Qylmystyq top qańtar aıynda osyndaı tásilmen «Kııa» avtokóliginen ishinde 1,5 mıllıon teńge aqshasy bar qol sómkeni alyp ketken. Qazirgi ýaqytta ustalǵan adamdar qamaýǵa alyndy jáne olardyń budan ózge de qylmystarǵa qatystylyǵy tekserilýde. Sonymen qatar, qylmystyq toptyń ózge de múshelerin ustaý boıynsha tıisti sharalar atqarylýda»,-dedi resmı ókil.
