Almatyda kólikterdiń ústine aǵash qulady
ALMATY. QazAqparat- Almatyda aǵashtar qulap, 4 kólikke zaqym keldi, zardap shekkender joq, dep habarlaıdy QazAqparat tilshisi.
Almaty qalalyq tótenshe jaǵdaılar departamentiniń málimetinshe, «112» jelisine túski saǵat 12:30 shamasynda qatty soqqan jeldiń áserinen aǵashtar men butaqtardyń kólikterge qulaǵany týraly habarlama tústi.
Atap aıtar bolsaq, Almaly aýdanynda - 2 jaǵdaı, Alataý aýdanynda - 1 jaǵdaı, Medeý aýdanynda ornalasqan ǵımarattyń árleý bólshekteri avtokólikke qulaǵany týraly- 1 habarlama keldi.
Tórt avtokólikke zaqym keldi.
Sondaı-aq, 109-qutqarý qyzmetine ótý joldaryna, jaıaý júrginshiler aımaǵyna jáne balalar alańyna butaqtar men aǵashtardyń qulaǵany týraly 17 habarlama kelip tústi.
«109 qyzmetiniń aqparatyna sensek, zardap shekkender men mert bolǵandar joq. Barlyq ótinim kezek tártibimen óńdeledi»,- dep habarlady qalalyq TJD.
