Almatyda kólikterdiń memlekettik nómirlerin urlaýdyń 21 faktisi tirkeldi
ALMATY. QazAqparat– Almaty qalasynyń aýmaǵynda jyl basynan beri turaqta turǵan kólikterden memlekettik nómirlerdi urlaýdyń 21 faktisi tirkeldi, dep habarlaıdy QazAqparat tilshisi.
Almaty qalalyq Polıtsııa departamentiniń baspasóz qyzmetiniń málimetinshe, tirkelgen 21 urlyqtyń 20-sy ashyldy. Úsh adam qylmystyq jaýapkershilikke tartyldy.
« Bul qylmystar materıaldyq-paıdakúnemdik sıpatqa ıe. Quqyq buzýshy jábirlenýshiniń memlekettik tirkeý nómirlik belgisin alyp ketip, avtokólik ıesine aldyn ala daıyndalǵan esepshotyna aqsha salýdy talap etedi. Aqsha túsken soń, urlanǵan nómirdi jasyrǵan jerin kórsetetinin jazyp, hat qaldyrady. Bul quqyq buzýshylyq boıynsha QR QK-niń 190-babyna sáıkes qylmystyq is qozǵalady», –dedi Almaty qalasynyń PD Krımınaldyq polıtsııa basqarmasynyń bastyǵy Erkin Іńkárov.
Al, 777, GGG jáne taǵy da basqa osy sııaqty resmı túrde birdeı áriptik belgilermen nemese sandar tizbegimen ornalastyrylǵan, aqyly negizde satyp alynyp, tirkelgen memlekettik tirkeý belgilerin urlaý QR QK-niń 188- baby 1-bóligi boıynsha aıypty dep tanylady. «Mundaı urlyqtyń jyl basynan beri bir faktisi tirkelgen. Kúdikti anyqtaldy. Sonymen qatar biz azamattardy qaskúnemderdiń jetegine ermeýge jáne dereý «102» pýltine habar berýge shaqyramyz», – dedi Erkin Іńkárov.
