Almatyda kólik jýyp júrgen 24 jasóspirim polıtsııa nazaryna ilikti
ALMATY. QazAqparat – Almatyda kóliktiń shamyn súrtip, jýyp jatqan jasóspirimder ustaldy, dep habarlaıdy QazAqparat tilishisi.
Almaty qalasynyń ıývenaldy polıtsııa qyzmetkerleri qala kóshelerinde avtokólikterdiń shamyn súrtip, jýýmen aınalysatyn kámeletke tolmaǵandardy anyqtaý boıynsha profılaktıkalyq jumystar júrgizýde.
«Qabyldanǵan sharalar nátıjesinde tamyz aıynyń basynan beri 24 fakt anyqtaldy. Polıtsııanyń nazaryna ilikken balalardyń ishinde 16 jasqa tolǵan eki adam bar. Demek, olar quqyq buzýshylyqtyń sýbektisi bolyp tabylady jáne óz áreketteri úshin tolyq jaýap bere alady. Qazir olarǵa qatysty ákimshilik hattamalar toltyryldy. Al qalǵan balalardyń ata-analarymen bolashaqta osyndaı jáıtterdi boldyrmaý týraly profılaktıkalyq áńgimeler ótkizildi. Eger aldaǵy ýaqytta qaıtalanatyn bolsa, olar ata-analyq mindetterin tıisinshe oryndamaǵany úshin ÁQBtK-niń 127-baby boıynsha ákimshilik jaýapkershilikke tartylady»,– dedi Almaty qalalyq PD jergilikti polıtsııa bóliminiń bastyǵy Manap Sattarov.
Tártip saqshylary ata-analar men kólik ıelerin balalardyń jolda kólik jýýyna jol bermeýge shaqyrdy.
