Almatyda kólik júrgizýshileri 5 jylǵa bas bostandyǵynan aıyryldy
ALMATY. QazAqparat Almatyda eki adamnyń ólimine ákep soqtyrǵan jol-kólik oqıǵasyna sebepshi kólik júrgizýshileri 5 jyl merzimge bas bostandyǵynan aıryldy, dep habarlaıdy QazAqparat tilshisi. Osydan bir jyl buryn Súıinbaı dańǵyly men Baıanaýyl kóshesiniń qıylysynda adam ólimine ákep soqqan iri jol-kólik oqıǵasy bolǵan edi.
Túngi 22:35-te «Sýbarý Legası» avtokóliginiń júrgizýshisi A.Petın Súıinbaı dańǵylymen ońtústik baǵytta júrip kele jatyp, Baıanaýyl kóshesine burylǵan. Baǵdarshamnyń sary túsi janyp tursa da «Sýbarý« burylýyn toqtatpaǵan. Osy ýaqytta J.Álipov rýlinde bolǵan «Mıtsýbısı Padjero» avtokóligi Súıinbaı dańǵylymen soltústikke qaraı júrip bara jatqan, onyń da salonynda eki jolaýshysy bolǵan. «Mıtsýbısı» júrgizýshisi onsyz da jypylyqtap turǵan baǵdarshamnyń sary túsinen úlgerip ótip ketý úshin gazdy qatty basqan. Al «Sýbarý» júrgizýshisi jyldam qımyldap, manevrdi aıaqtaýǵa asyqqan. Osynyń saldarynan eki kólik qatty soǵyldy.
Soqqydan «Mıtsýbısı» tóńkerilip qalǵan. Al onyń salonynda bolǵan áıelderdiń bireýi kólikten ushyp ketip, kóshe boıyna ornatylǵan baǵanaǵa soǵylǵan. Inertsııanyń kúshimen «Mıtsýbısı» asfaltta syrǵyp, qaıtadan aýdarylyp, júrisin jalǵastyryp, avtokólik basqarýsyz jol boıymen júre bergen. Ári qaraı kólik úshinshi mashınaǵa soǵysyp, toqtaǵan. Jol-kólik oqıǵasy saldarynan «Mıtsýbısı» avtokóliginiń salonynda bolǵan jolaýshylar, bir-birine týys bolyp keletin eki áıel de kóz jumdy», – dedi Almaty qalasynyń PD Anyqtaý basqarmasynyń bastyǵy Oljas Sháripov.
Sot otyrysy barysynda A.Petın men J.Álipov óz kinálaryn tolyqtaı moıyndady. Sot A.Petın men J.Álipovty Qazaqstan Respýblıkasy Qylmystyq kodeksiniń 345-babynyń 4-bóliginde kózdelgen qylmystyq quqyq buzýshylyqty jasaǵany úshin kináli dep tanyp, olardyń árqaısysyna 5 jylǵa bas bostandyǵynan aıyrý jazasyn taǵaıyndady.
«Bireýlerdiń et jaqyndary osyndaı nemquraılylyq saldarynan qaıtys boldy. Júrgizýshilerdiń bireýi toqtaý kerek bolsa da, baǵdarshamnyń sary túsine ótip ketti, ekinshisi manevrdiń qaýipsizdigine senimdi bolmaı, buryla bastady. Eki júrgizýshiniń de beıqamdyǵy osyndaı qaıǵyly saldarlarǵa ákep soqtyrdy. Muqııat jáne saq bolý mańyzdy, bastysy eshqaıda asyqpaý kerek. Sebebi túptiń túbinde asyǵatyn jeriń bolmaı qalýy da múmkin», – dep túıindedi Oljas Sháripov.
