Almatyda kólik urysy jol apatyn jasap, bir adam qaza tapty
ALMATY. QazAqparat - Almatyda kólik urysy adam ólimine ákep soqqan kólik apatyn jasady, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, buryn birneshe ret sotty bolǵan 22 jastaǵy azamat «Aqsaı» yqshamaýdanyndaǵy úılerdiń biriniń aýlasynan «Mazda» kóligin urlap ketken. Sodan keıin taǵy birneshe qylmys jasaǵan.
Dálirek aıtsaq, Alataý aýdanyndaǵy turǵyn alabynda kúdikti túngi ýaqytta úsh kóliktiń akkýmýlıatoryn urlap ketken. Al tańǵy altyda adam ólimine ákep soqqan jol apatyn jasady.
«Ol Saın kóshesimen soltústik baǵytta kele jatyp, Abaı dańǵylymen qıylysta «Toyota Corolla» jáne «Kia Rio» kólikterimen soqtyǵysqan. Saldarynan «Kia Rio» ınertsııamen kedergige soǵyldy. Bul kólikti 52 jastaǵy er adam basqarǵan. Ókinishke oraı, ol alǵan jaraqattarynan oqıǵa ornynda kóz jumdy», – dedi Almaty qalalyq PD Anyqtaý basqarmasynyń bastyǵy Oljas Sháripov.
Kúdiktini patrýldik polıtsııa qyzmetkerleri qolǵa túsirdi. Belgili bolǵandaı, «Mazda» kóliginiń ıesi mashınasynyń urlanǵanyn bilmegen.
«Adam ólimine ákep soqtyrǵan jol-kólik oqıǵasyna qatysty QR QK-niń 345-baby 3-bóligine (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) sáıkes, sotqa deıingi tergeý bastaldy. Tergeý sonymen qatar, bóten kólikti zańsyz ıelený, bótenniń múlkin urlaý derekteri boıynsha da júrgiziletin bolady. Kúdikti QR QPK-niń 128-babyna sáıkes ýaqytsha ustaý ızolıatoryna qamaldy», – dedi polıtsııa ókili.
