Almatyda kólik urysy ózine pyshaq saldy

ALMATY. QazAqparat – Almatyda bireýdiń kóligin aıdap ketpek bolǵan er adam polıtsııa qyzmetkerleri izine túskennen keıin, ózine pyshaq saldy, dep habarlaıdy Qazaqparat tilshisi.

Onyń vıdeosy áleýmettik jelide tarady.

Beınejazbadan er adamnyń qanǵa boıalǵan jerde jatqanyn jáne ony polıtsııa qyzmetkerleri ustaǵanyn kórýge bolady.

Almaty qalalyq Polıtsııa departamenti málim etkendeı, 24 qańtarda jedel basqarý ortalyǵyna er adam qońyraý shalyp, belgisiz bireý onyń «Deý» avtokóligin urlamaq bolǵanyn jetkizdi.

Qońyraý shalýshy keńse pyshaǵymen qarýlanǵan kúdiktini jaıaý ańdyp kele jatqanyn aıtqan.

Birneshe mınýttan keıin patrýldik polıtsııa qyzmetkerleri er adamǵa kómekke keldi. Artyna túsken tártip saqshylarynan qashyp, jasyrynǵysy kelgen kúdikti, ózine pyshaq jaraqatyn saldy.

Medıtsınalyq kómek alý úshin ol qaladaǵy aýrýhanalardyń birine jetkizildi.

«Іs júrgizý barysynda, kúdiktiniń bóten adamnyń kóligin «Aqsaı» shaǵyn aýdanynda urlap ketkeni anyqtaldy. Sol jerde ol jol-kólik oqıǵasyn jasady. Kólik ıesi apat ornyna jaıaý júgirip jetip, kólikti aıdap áketken adamdy ustaýǵa árekettengen. Atalǵan derek boıynsha qylmystyq is tirkeldi. Basqa da mán-jaılar anyqtalatyn bolady», - dedi, Áýezov aýdandyq polıtsııa basqarmasynyń bastyǵy Ulan Ábilqaıyr.