Almatyda kólik urylary ustaldy
ALMATY. QazAqparat – Almaty polıtsııasy avtokólik urlaýmen aınalysqan eki adamdy ustady, dep habarlaıdy QazAqparat tilshisi.
Qalalyq Polıtsııa departamentiniń baspasóz qyzmeti habarlaǵandaı, Almaty oblysynyń 21 jastaǵy turǵyndary 1 aı ýaqyt ishinde Áýezov, Bostandyq, Jetisý aýdandarynda kólikterdi urlaýmen aınalysqan. «Tergeý nátıjelerine sáıkes olar kóbinese «Mazda», «Mıtsýbısı», «Toıota» kólikterin oljalaýǵa tyrysqany anyqtaldy. Urlanǵan kólikterdi olar eski garajǵa ákelip, bólshektep otyrǵan. Qazirgi tańda bul derek QR QK 188-babynyń 3-bólimimen sotqa deıingi tergeý isi reestrine tirkeldi. Kólikterdiń barlyǵy ıelerine tapsyryldy.
Kúdiktiler ýaqytsha ustaý oqshaýlaǵyshyna qamaldy. Olardyń basqa qylmystarǵa qatystylyǵy tekserilip jatyr», - dedi Qalalyq Polıtsııa departamentiniń basqarma basshysy Janbolat Zıadın.
