Almatyda kólik turaqtarynyń sanatyna qaraı jerge salynatyn salyq mólsherlemesi ulǵaıtylmaq
ALMATY. 29 aqpan. QazAqparat - Búgin Almatyda 5-saılanǵan qalalyq máslıhattyń 3-sessııasynda «Avtoturaqtar úshin bólingen jerlerge salynatyn bazalyq salyq mólsherlemesiniń keıbir máseleleri týraly» sheshim qabyldandy.
Onda arnaıy baıandama jasaǵan Jer qatynastary basqarmasynyń bastyǵy Qýanyshbek Qashyqbaev birneshe usynystar jasady. Olar: Salany yntalandyrý jáne avtokólik qoıý máselesin sheshý úshin avtomobıl qoıatyn oryndardy qarastyratyn kúrdeli qurylys nysandaryn salý mólsherlemesin eń tómengi deńgeıde (2 ese) ulǵaıtý. Almaty qalasynda avtoturaqtardy 4 sanatqa bólý jáne ár sanatqa arnalǵan salyq salý mólsherlemesin belgileý. Atap aıtqanda, qyzmettik kólikter jáne aıyp avtoturaqtary, sondaı-aq áleýmettik jaǵdaıy tómen toptarǵa arnalǵan avtoturaqtardy 1-sanatqa jatqyzý jáne bazalyq mólsherlemeni ulǵaıtý. Jobalaý qujattamasymen jerasty deńgeıinde ornalasqan nemese kózdelgen jáne osyndaı ǵımarattardyń ajyramas quramdas bóligi bolyp tabylatyn avtoturaqtar úshn bólingen jerler. Sondaı-aq avtomobıl qoıatyn oryndardy nemese kópıarýsty avtoturaqtardy qarastyratyn kúrdeli qurylystardy 2-sanatqa jatqyzý jáne eldi meken jerlerine arnalǵan bazalyq mólsherleme boıynsha 2 eselengen salyq salý. Avtomobılderi bar ardagerler men zeınetkerlerdiń jerústi avtoturaqtaryna salynatyn salyq mólsherlemesiniń ulǵaıýyna qatysty pikirlerin eskere otyryp, olardy 3-sanatqa jatqyzý jáne bazalyq salyq mólsherlemesin 5 ese ulǵaıtý. Al 4-sanatqa táýlik boıy bir orynǵa birneshe kólik qoıylatyn jáne saǵattyq nemese táýliktik tarıf qoldanatyn avtoturaqtardy jatqyzý jáne bazalyq salyq mólsherlemesin 10 ese ulǵaıtý.
