Almatyda kólik tonaǵan 40-qa jýyq top ustaldy
ALMATY. QazAqparat - Almaty qalasynda avtokólikterdi tonaýmen aınalysqan 40-qa jýyq top quryqtaldy, dep habarlaıdy QazAqparat tilshisi.
Qalalyq krımınaldyq polıtsııa basqarmasynyń málimetinshe, toptardyń quramyna 85 adam kirgen.
«Qaraýsyz qaldyrylyp, qorǵaý jabdyqtary joq kólik quraldarynda urlyq kóp jasalǵan. Mysaly, mundaı epızodtardyń biri taıaýda qaladaǵy Áýezov aýdanynyń «Jetisý» shaǵynaýdanynda oryn aldy. Túngi ýaqytta K. esimdi azamat Toyota Camry markaly avtokóliktiń shynysyn syndyryp, ishinen beınetirkeýishti urlap alady. Alaıda, urlaǵan zatyn alyp, alysqa kete almady: er adamdy jol-patrýldik polıtsııa qyzmeti ustady. Atalǵan faktimen QR QK 188-babymen (ózgeniń múlkin urlaý) qarastyrylǵan qylmys belgileri boıynsha sotaldyndaǵy tergeý amaldary júrgizilýde. Sondaı-aq, er adamnyń osyǵan uqsas basqa epızodtarǵa qatysy tekserilýde», - dep habarlady krımınaldyq polıtsııa basqarmasynyń bastyǵy Esen Ysqaqov.
Polıtsııada ótken jyly qaraqshylyq tonaýmen aınalysqan 49 top, tonaýshylyq jasaǵan 124 top, páter urlyqtaryn jasaǵan 27 top, kólik urlyqtarymen aınalysqan 39 top, qoǵamdyq jerlerde jeke zattardy urlaǵan 55 top jáne kólikterdi urlap, aıdap áketýmen aınalysqan 16 toptyń qyzmeti toqtatylǵany týraly málim etti.
Avtor: Danııar Dáýitálıev
