Almatyda kólik satýmen aınalysyp júrgen alaıaq ustaldy
ALMATY. QazAqparat - Almatyda arzan kólik alyp berem dep eldiń 21 mln teńgesin qoldy etken jigit ustaldy, dep habarlaıdy QazAqparat tilshisi.
Bostandyq aýdany ІІB habarlaǵandaı, 33 jastaǵy Mıkael Shagıtov avtokólik saýdasymen aınalysqan.
Bireýlerdi lombardtardan naryqtaǵydan arzan baǵamen alyp berem dep aldasa, keıbireýlerge qymbatqa satyp berem dep aldaǵan.
Osylaısha ózgelerdiń kóligin ıemdenip alyp óz maqsatyna paıdalanǵan.
«Aýdandyq ІІB-ge 5 adam shaǵymdandy. Japa shekkenderdiń sany odan da kóp bolýy múmkin. Shagıtov barlyǵy 21 mln teńge kóleminde shyǵyn keltirdi degen kúdik bar. Ol munyń aldynda osy tektes qylmys jasaǵany úshin isti bolǵan eken. Bul adamnyń áreketinen japa shekken adamdar bolsa, 254-47-00, 254-47-01, 254-47-02 telefondaryna habarlasýyn suraıdy», - dedi Bostandyq aýdandyq ІІB basshysy Dáýren Ótebaev.
