Almatyda kólik qozǵalysyna shekteý qoıyldy
ALMATY. QazAqparat - Almatydaǵy Almagúl jáne shaǵyn aýdany men tanymal saýda oıyn-saýyq ortalyǵyna demalys kúnderinde kólikpen kirý múmkin bolmaı qaldy, dep habarlaıdy QazAqparat tilshisi oqıǵa ornynan.
Osy ýaqytta Gagarın, Rozybakıev kósheleri Qojabekov kóshesinen Ótepov kóshesine deıin jabyq. 1, 9 nómirli troleıbýs baǵyttary osynyń saldarynan Atakentten burylýǵa májbúr. Al 123 jáne 81-shi avtobýstar Gagarın men Ótepov kósheleriniń qıylysynan qaıtýda. 98 jáne 30-shy nómirli avtobýstar Jarokov kóshesiniń jabylǵan bóligin aınalyp ótip jatyr. Kólikter kiretin jol jabyq. Osylaısha, Almagúl aýdanynyń turǵyndaryna jáne Rozybakıev pen Qojabekov kósheleriniń qıylysyndaǵy saýda oıyn-saýyq ortalyǵyna baram deýshilerge Ótepov kóshesinen Ál-Farabı dańǵylyna deıin jaıaý júrýge týra keledi.
Joldy jabýǵa Gagarın men Rozybakıev kóshelerin tolyq jóndeýden ótkizý jumystary sebep bolyp otyr. Atalmysh kóshelerdiń eski asfalty alynyp, ornyna jańa asfalt tóselip, jol jıekteri de jańartylýda.
