Almatyda kólik keptelisin azaıtýdyń joldary aıtyldy
ALMATY. QazAqparat - Almatyda jol qozǵalysyn uıymdastyrýdyń keshendi syzbasy talqylandy, dep habarlaıdy QazAqparat tilshisi.
Jıynda búgingi tańda Almatyda 467 myń kólik tirkelgen. Almaty oblysynda tirkelgeni 485 myń, olardyń 300 myńnan astamy qalaǵa qatynaıtyny aıtyldy. Resmı statıstıkaǵa júginsek, 2017 jyldyń maýsym aıynda megapolıs halqynyń sany 1mln 777 myń turǵynǵa jetken.
Almaty qalasy ákiminiń orynbasary Murat Dáribaev qazirgi kezde kólikti ótkizý qabiletin ulǵaıtý jónindegi reformanyń tolyq qarqyn alǵanyn atap ótti.
«Megapolıs ortalyǵynda qoǵamdyq kólikterdiń jolaqtary erekshelenýde, 30 jolaıryǵy salynýda, jaıaý júrginshi aımaǵy jasalyp jatyr. Qalada kólik turaqtaryn abattandyrý jumystary jalǵasýda», - dedi ol.
Almaty ákimdigi qalanyń kóshe-jol júıesiniń kólikti ótkizý qabiletin arttyrýǵa yqpal etetin JQUKS (jol qozǵalysyn uıymdastyrýdyń keshendi syzbasy) jobasyn jasaýǵa tapsyrys bergen edi.
«Qalada qarbalas sátte kólik qozǵalysynyń jyldamdyǵy 19 km saǵatqa deıin tómendeıdi. Almatyda 2017-2023 jyldary Jol qozǵalysyn uıymdastyrýdyń keshendi syzbasy jobasy barysynda ýaqyttyń tyǵyzdyǵy kezinde kólik qozǵalysynyń ortasha jyldamdyǵy 25 km saǵatqa jetedi», - dedi Almaty qalasy Jolaýshylar kóligi jáne avtomobıl joldary basqarmasy basshysynyń orynbasary Talǵat Hoschanov.
Shara barysynda joǵary jyldamdyqtaǵy avtobýs qatynasynyń 1-shi kezeginiń qurylysy talqylandy. Onyń 2-shi kezeginiń qurylysy jobalanýda, sonymen qatar jeńil relsti kólik (JRK) jobasyn júzege asyrý máselesi sóz boldy, jańa jolaqtar paıda bolýda, jańa kólik baǵyttary ashylýda, velobeketter jáne basqalary jasalýda.
Aıta keteıik, JQUS jobasy boıynsha Qurmanǵazy jáne Shevchenko kósheleri boıynda bir jaqty kólik qozǵalysy jasaldy.
«Almaty qalasy aýasynyń sapasy barynsha tómen. Kóp jyldan beri aýanyń lastaný ındeksi turaqty túrde 10 birlikten asyp túsedi. Qara tozań qalanyń basym bóligin qamtyǵan, bul tozańnyń 90 %-y kólikten shyǵady. Jol qozǵalysyn uıymdastyrýdyń keshendi syzba (JQUKS) jobasy júzege assa megapolıs ekologııasy jaqsarady, kólik problemasy sheshimin tabady, qala turǵyndary úshin jaıly jaǵdaı jasalatyn bolady», - dedi Talǵat Hoschanov.
