Almatyda kólik qaqqan jaıaý júrginshi qaza tapty
ALMATY. QazAqparat - Almatyda iri magıstraldardyń birinde avtomobıldiń astynda qalǵan jaıaý júrginshi kóz jumdy, dep habarlady «QazAqparat» HAA tilshisi oqıǵa ornynan.
Qaıǵyly oqıǵa seısenbige qaraǵan túni Rysqulov dańǵylynda, Emtsov kóshesimen qıylysqa taıaý jerde shaǵyn Dýbosekovskaıa men Chýrın kósheleri arasynda boldy.
Kórgenderdiń aıtýynsha, jaıaý adam joldyń tyıym salynǵan jerinen kesip ótpek bolǵan. Al Rysqulov dańǵylynan shyǵys baǵytqa bet alǵan Volkswagen avtomobıliniń júrgizýshi qara kıimdi adamdy sol sátte ańǵara almaı qalǵan. 
Ázirge kim ekendigi belgisiz jaıaý júrginshi qatty soqqydan sol jerde kóz jumdy.
Oqıǵa ornyna jeńil járdem keldi. Polıtsııa qyzmetkerleri JKO-nyń sebep-saldaryn naqtylaýda.
