Almatyda kólik qaqqan balanyń anasy ony qalaı joǵaltqanyn aıtyp berdi
ALMATY. QazAqparat - Almatynyń Shyǵys aınalma jolynda kólik qaǵyp ketken balanyń anasy ulynyń qalaı joǵalǵanyn aıtyp berdi, dep habarlaıdy QazAqparat tilshisi.
«Munyń qalaı bolǵanyn túsinbeı qaldym. Ulym aýlada júrgen. Aradan 50 mınýt ótti. Ol kúıeýimniń janynda bolar dep oıladym. Al, ol jumysqa ketip qalypty. Jubaıym da baıqamaı qalǵan sııaqty. Ári qaraı oǵan ne bolǵanyn bilmeımin. Ony izdep aıaldamaǵa bardym, ol jaqta da kórinbedi. Keıin polıtsııaǵa habarlastym, olar maǵan jol apaty bolǵanyn aıtty. Biz sonda bardyq», - dedi balanyń anasy Azıza Askar-ogly.
Anasynyń aıtýynsha, 4 jastaǵy Dinmuhammed balabaqshaǵa baryp júrgen. Áıel únemi ulynyń janynda otyr.
«Ony palataǵa aýystyrdy. Dárigerler onyń jaǵdaıyn turaqty dep aıtty. Ázirge sóılep jatqan joq. Suraq qoısam, kózimen ısharat bildiredi. Birdeńe aıtsam, kúledi. Dárigerler onyń qalpyna kelýi úshin ýaqyt kerek dep jatyr. Sabyr saqtaý kerek», - dedi Azıza.
Budan buryn dárigerler Dinmuhammedtiń sóılep jatqanyn jáne tamaq ishe alatanyn habarlaǵan edi. Biraq, bala ázirge oń qoly men aıaǵyn durys qımyldata almaıdy. Sondaı-aq, dárigerlerdiń aıtýynsha onyń saýyǵýyna 2-3 apta kerek.
Eske salaıyq, 16 shildede 4 jasar balany Almatyda Shyǵys aınalma jolynda kólik qaǵyp ketken edi. Bir nusqa boıynsha, ony qaqqan kóliktiń ıesi balany oqıǵa ornynan alyp ketip, ony úılerden alys jerdegi butalardyń arasyna tastap ketken. Balany joldan ótip bara jatqandar taýyp alǵan. Ol basynan jaraqat alǵan.
