Almatyda kólik ınfraqurylymyn jaqsartý sharalarynyń nátıjesinde aýaǵa taralalatyn zııandy zattar 19,9-dan 17,9 paıyzǵa kemidi
ALMATY. 30 naýryz. QazAqparat /Erlik Erjanuly/ - Almatyda 2011/2012 jyldardaǵy jylý maýsymy kezinde 1-shi JEO tolyqtaı gazǵa kóshiriledi. Bul týraly búgin «Ekologııalyq taza qalanyń kólik júıesi» dep atalatyn semınarda qala ákimi Ahmetjan Esimov aıtty.
«Qala atmosferasyna jyl saıyn 237 myń tonna zııandy zattar taralady. Olardyń 190 myńy kólik quraldarynan, 23 myńy jylý kózderinen, 16 myńy jeke sektordaǵy turǵyn úılerden, 3 myńy ónerkásip oryndarynan bólinedi», - deıdi Ahmetjan Smaǵululy.
Qala basshysynyń aıtýynsha, ákimdik ekologııalyq ahýaldy jaqsartý maqsatynda kóptegen is-sharalardy júzege asyryp jatyr. Qazir Almatyda 500 myńnan astam kólik quraly tirkelgen. Sondaı-aq kún saıyn ózge aımaqtardan qalaǵa 200 myńǵa jýyq avtomobıl keledi. Bul qala ekolgııasyna úlken júkteme bolyp otyr. Sondyqtan birinshi kezekte avtomobıl maılarynyń sapasyn qadaǵalaý men kólik quraldarynyń tekserýden ótýine kóńil bólinýde. Odan keıingi basty nazar kólik ınfraqurylymyn damytýǵa aýdarylyp otyr. Máselen sońǵy 3 jylda 7 jol aıryǵy men shyǵys aınalma jolynda týnnel salyndy. Sonyń nátıjesinde lastaný ındeksi 2009 jylǵy 19,9 paıyzdan byltyr 11,7 paıyzǵa deıin kemidi.
A. Esimov: «Statsıonarlyq kózderdiń aýany lastaýy da 2,6 myń tonnaǵa azaıdy. 2011/2012 jyldardaǵy jylý maýsymynda endi 1-jylý elektr ortalyǵy tolyq gazǵa kóshiriledi. Bul qala úshin mańyzy zor úlken oqıǵa bolmaq», - dedi. Onyń sózine qaraǵanda, qazir ákimdik «Samuryq-energo» kompanııasymen 2-JEO-ny da gazǵa kóshirý jóninde jumys júrgizýde. Sońǵy 2 jylda qalada 57 shaqyrymdyq gazben qamtamasyz etý jelisi jasalyp, jeke sektordaǵy 20 myń úıge gaz júrgizilgen bolatyn. Aldaǵy 2 jylda «Qaztransgaz» kompanııasy endi jeke sektordy gazdandyrýdy tolyq aıaqtaǵaly otyr.
