Almatyda kólik ınfraqurylymyn damytý jónindegi keńes quryldy
ALMATY. QazAqparat - Almaty qalasy ákiminiń janynan qalanyń kólik ınfraqurylymyn damytý jónindegi keńes quryldy, dep habarlaıdy QazAqparat tilshisi.
Baqytjan Saǵyntaevtyń tóraǵalyǵymen ótken keńestiń birinshi otyrysynda qoǵamdyq kólikterdiń jumysy, jol ınfraqurylymynyń qaýipsizdigi jáne velojolaqtardy uıymdastyrýdyń ózekti máseleleri talqylandy.
Megapolıs basshysy keńestiń qalanyń kólik ınfraqurylymyn damytý jáne Vision Zero Almaty tujyrymdamasy aıasynda jol qaýipsizdigin qamtamasyz etýdiń ózekti máseleleri boıynsha naqtyly sheshimderdi talqylaý jáne qabyldaýdyń dıalog alańyna aınalatynyn atap ótti.
Keńes quramyna osy salanyń sarapshylary, qoǵam belsendileri jáne kásiporyndardyń basshylary endi.
Keńes qalanyń kólik ınfraqurylymyn jetildirý boıynsha usynystar ázirleıdi ári olardyń júzege asýyna monıtorıng júrgizedi jáne baǵa beredi, onyń ishinde kólik salasyndaǵy Memlekettik-jeke áriptestik jobalaryn baqylaıdy, sondaı-aq kólik salasynda týyndaǵan qoǵamdyq máseleler boıynsha konsýltatıvti kómek kórsetedi.
Baqytjan Saǵyntaev keńes músheleri árqaısysynyń jolaýshylar tasymalynyń sapasyn arttyrýǵa, jol qozǵalysyna qatysýshylardyń qaýipsizdigine jáne qalanyń kólik júıesin damytýdyń keshendi josparyn jetildirýge óz úlesterin qosatynyndaryna senim bildirdi.
Alǵashqy kezdesý barysynda jolaýshylar tasymalynyń sapasy, jol ınfraqurylymynyń qaýipsizdik standarttaryna sáıkestigi, Almatynyń Bas josparyndaǵy kólik bóliminiń mártebesi týraly máseleler kóterildi.
Sátbaev kóshesi boıymen Şepetkov kóshesinen Manas kóshesine deıingi velosıped qozǵalysyn uıymdastyrý jobasy jeke qaraldy.
