Almatyda kólik basyp ketken 1 jasar bala mert boldy
ALMATY. QazAqparat - Almatynyń Alataý aýdanynda jeke úıdiń aýlasynda bir jasar balany kólik basyp óltirdi, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, qaıǵyly oqıǵa 24 sáýir kúni bolǵan.
Jeke úıdiń aýlasynan shyǵyp bara jatqan «Mitsubishi Delica» kóliginiń 36 jastaǵy júrgizýshisi balany baıqamaı basyp ketken.
2021 jyly týǵan búldirshin alǵan jaraqatynan jedel járdem kelgenshe oqıǵa ornynda kóz jumdy.
«Atalǵan derek negizinde QR Qylmystyq kodeksiniń 345-babynyń 3-bóligi boıynsha qylmystyq is qozǵaldy. Saraptamalar taǵaıyndaldy»,- dedi Almaty qalalyq polıtsııa departamentiniń resmı ókili Saltanat Ázirbek.
Buǵan deıin Almaty oblysynyń Eskeldi aýdanynda 23 sáýir kúni keshki saǵat 22:05 shamasynda «Audi-80» kóliginiń júrgizýshisi úsh adamdy, onyń ishinde eki balany qaǵyp mert qylǵanyn habarlaǵan bolatynbyz.
