Almatyda kólik apatynan eki adam mert boldy
ALMATY. QazAqparat – Almatyda eki kólik soqtyǵysyp, eki adam mert boldy, dep habarlaıdy QazAqparat tilshisi.
Almaty qalalyq Polıtsııa departamenti málim etkenindeı, oqıǵa búgin tańǵy saǵat 04.00 shamasynda Áýezov aýdanynda boldy.
«Subaru» men «Mitsubishi» kólikteri soǵyldy, saldarynan «Mitsubishi» kóliginiń júrgizýshisi men jolaýshysy qaza tapty, taǵy beseýi túrli dene jaraqatyn aldy.
«Bul derek QR Qylmystyq kodeksiniń 345-baby 4-bóligi boıynsha sotqa deıingi tergeýdiń biryńǵaı tizilimine tirkeldi. Birqatar saraptama taǵaıyndaldy, olardyń nátıjeleri boıynsha apat hronologııasy shyǵady. Sol arqyly tergep-tekserýdiń tolyqtyǵyn, jan-jaqtylyǵy men obektıvtiligin qamtamasyz etýge bolady»,- dep habarlady polıtsııadan.
