Almatyda kólik apaty kóp oryn alatyn jol ýchaskeleri belgilendi
ALMATY. QazAqparat - Almatyda jol-kólik apattary jıi oryn alatyn jol ýchaskeleri belgilendi. «Kompetenz» saqtandyrý kompanııasynyń Aqparattyq-saraptamalyq ortalyǵy 2015 jyly bolǵan jol apattaryn saraptaı kele, kólik apattary eń jıi bolatyn jol ýchaskelerin anyqtady.
Keltirilgen derekterge sáıkes, Shyǵys aınalma jolynyń Halıýllın kóshesinen Baltabaev kóshesine deıingi aralyǵy reıtıngtiń kósh basynda keledi. Munda kún saıyn orta eseppen 2,9 jol-kólik apaty tirkeledi eken. Eń basty sebep - jyldamdyq rejimin saqtamaý. Jóndeý jumystarynyń ortasha baǵasy - 343 289 teńge.
Budan keıingi orynǵa Raıymbek dańǵylynyń «Altyn orda» bazary mańyndaǵy ýchaskesi ornalasty. Úshinshi orynda Raıymbek dańǵyly boıyndaǵy burynǵy «Saıahat» avtovokzalynyń aýmaǵy. Al tórtinshi orynda Raıymbek dańǵyly men Seıfýllın dańǵyldarynyń qıylysy. Sondaı-aq, Tóle bı men Baızaqov kósheleri, Abaı dańǵyly men Áýezov kóshesi jáne Altynsarın men Jandosov kósheleriniń qıylysynda da kólik apattary jıi oryn alyp jatady. Basty sebepter - basyp ozý jáne oraǵytyp ótý erejelerin saqtamaý.
QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń deregine sáıkes, Almatyda 2016 jyldyń alǵashqy 2 aıynda 837 jol-kólik apaty bolǵan. Bul osy mezgilde elimizde oryn alǵan jol apattarynyń 30 paıyzyn quraıdy. Jol-kólik apattarynyń 90 paıyzy júrgizýshilerdiń kinásinen oryn alady.
Sondyqtan, saqtandyrý kompanııasy júrgizýshilerdi jol qozǵalysy erejesin saqtaýǵa shaqyrady.
