Almatyda kóliginde qarý saqtap júrgen adam ustaldy
ALMATY. QazAqparat - Almatyda polıtseıler kúdik týǵyzǵan kólikten qarý tapty, dep habarlaıdy QazAqparat tilshisi.
Qalalyq polıtsııa departamentiniń baspasóz qyzmetiniń habarlaýynsha, quqyq qorǵaýshylar magıstraldi kóshelerdiń birinde aq tústi «Toıota Kamrı 70» kóligin toqtatqan.
«Tekserý kezinde júrgizýshiniń kólik júrgizýge ruqsat qujaty joq bolyp shyqty. Ol qalada bóten bireýdiń kóligimen júrgen. Inspektorlar kólikten jaryq jáne dybys sıgnaldaryn shyǵaratyn qural taýyp aldy. Ereje buzǵan adam sabyrsyzdanyp qaıta-qaıta bireýlerge telefon shalýmen boldy», - dedi polıtsııanyń baspasóz qyzmeti.
Al kóliktiń júk salǵyshynan «Baıkal» travmatıkalyq tapanshasy men oq-dáriler qoraby, eki kólik nómiri, 100 dollarlyq kýpıýralar qaptamasy tabyldy.
«Bul zattardyń kimge tıesili ekenin ol túsindire almady. "Meniki emes" dep aqtaldy. Kóliktiń esepten shyǵarylǵany, alaıda qaıta tirkelmegeni belgili boldy. Qazir oǵan qatysty QR QK 287-babynyń 2-bólimimen qarý jaraqty saqtaý, ustap júrý, satý boıynsha qylmystyq is qozǵaldy. Kólik ıesi mashınasyn bireýge ruqsatsyz bergeni úshin ákimshilik jaýapkershilikke tartyldy. Kólik aıyp turaǵyna qoıyldy», - dedi polıtsııa departamentinen.
