Almatyda kóligin gazon ústine qoıyp ketken áıel aıyppul tóleıtin boldy
ALMATY. QazAqparat - Almatyda Porshe Kaıen kóligin gazon ústine qoıyp ketken áıel jaýapkershilikke tartyldy, dep habarlaıdy QazAqparat tilshisi.
Bul quqyqbuzýshylyqty Almaty turǵyndary sýretke túsirip, áleýmettik jelide taratyp jibergen bolatyn.
«Atalǵan derek boıynsha 47 jastaǵy áıel QR ÁQK 597-babynyń 2-bólimine sáıkes ákimshilik jaýapkershilikke tartyldy. Áıel adam óziniń jol erejesin buzǵanyn moıyndady. Qalalyq polıtsııa turaq erejesin buzǵan avtojúrgizýshilermen júıeli túrde túsindirý jumystaryn júrgizip keledi», - dedi qalalyq ІІD jergilikti polıtsııa qyzmetiniń basshysy Jasulan Baıkenov.
Onyń aıtýynsha, jyl basynan beri 13 400 júrgizýshi kóligin durys qoımaǵany úshin jaýapkershilikke tartylǵan.
Onyń ishinde 1200 adam kóligin múgedekterge arnalǵan turaqqa qoıǵan.
