Almatyda kóligimen keri qaraı júrgen Gelandewagen júrgizýshisine aıyppul salyndy
ALMATY. QazAqparat – Almatylyq 22 jastaǵy «Gelandewagen» júrgizýshisine kólikpen artqa júrgeni úshin aıyppul salyndy, dep habarlaıdy QazAqparat tilshisi Almaty polıtsııasyna silteme jasap.
Almatylyq jas júrgizýshige polıtsııa birden úsh hattama toltyrdy. Ákimshilik jaýapkershilikke tartyp, aıyppul saldy.
«Ádette, jol erejelerin buzatyndar buǵan aldyn ala daıyndalady. Jas jigit óziniń kóligine jalǵan nómir belgilerin ornatqan. Osy úshin QR Ákimshilik quqyq buzýshylyq týraly kodeksiniń 590-baby 3-tarmaǵyna sáıkes 15 AEK aıyppul tóleýi tıis. Jalǵan nómirli kólikti basqarǵany úshin 20 AEK aıyppul nemese 6 aı merzimge júrgizýshi kýáliginen aıyrylady. Qazir bul óndiris materıaldary sheshim qabyldaý úshin Almaty qalalyq mamandandyrylǵan aýdanaralyq ákimshilik sotyna jiberildi», - dedi AP Ákimshilik polıtsııa basqarmasynyń bastyǵy Jandos Muratalıev.
Budan bólek, júrgizýshige kóligin artqa aıdaǵany úshin úshinshi hattama toltyryldy. Jol júrý erejesin óreskel buzǵany úshin ol 10 AEK aıyppul tóleıdi.
