Almatyda kóligimen adam qaǵyp óltirgen kúdikti ustaldy
ALMATY.QazAqparat - Almatyda ótken túnde kóligimen jaıaý adamdy qaǵyp óltirip, oqıǵa ornynan izin sýytqan «Leksýs» júrgizýshisi ustaldy, dep habarlaıdy QazAqparat tilshisi.
Almaty ІІD jergilikti polıtsııa qyzmeti izdestirý bóliminiń qyzmetkerleri kólik ıesin tapty. Polıtseılerdiń anyqtaýynsha, 24 jastaǵy kúdikti «Leksýs 330» markaly avtokóligimen Saın kóshesiniń boıymen soltústik baǵytta kele jatyp, Tóle bı kóshesiniń qıylysynda 55 jastaǵy er adamdy qaǵyp ketken. Jaıaý júrginshi alǵan jaraqatynan sol jer kóz jumǵan. Kólik ıesi ony qaldyryp, oqıǵa ornynan ketip qalǵan.
«Alǵashqy shuǵyl sharalar barysynda vıdeomonıtorıngtiń kómegimen jáne oqıǵa ornyn tekserý kezinde alynǵan saraptamalyq fragmentter nátıjesinde avtokólik tabyldy. Keıin onyń júrgizýshisi de anyqtaldy. Kúdikti Almaty oblysynyń turǵyny, ol qamaýǵa alyndy»,- dedi Almaty ІІD jergilikti polıtsııa qyzmeti izdeý bóliminiń podpolkovnıgi Erik Nasyrbekov.
Polıtsııa málimetinshe, kúdikti bir jyl buryn mas kúıinde kólik júrgizip, sol úshin kýáliginen aıyrylǵan eken.
«Tergeý basqarmasynda sotqa deıingi is júrip jatyr. Aıyptalýshy QR QK 345 babynyń 3 tarmaǵy jáne 345 babyna sáıkes eki birdeı qylmysy úshin jaýapqa tartylady. Jaraqat alǵan adamdy tastap, oqıǵa ornynan qashyp ketkeni úshin bólek jazalanady. Qazir kúdikti túsinikteme berip jatyr»,-dedi podpolkovnık Erik Nasyrbekov
