Almatyda qolaısyz aýa raıynan 8 kólik apaty boldy
ALMATY. QazAqparat - Aýa raıyna baılanysty Almaty polıtsııasy azamattardy jol ústinde asa muqııat bolýǵa shaqyrady, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, búgin tańǵy saǵat 06:00 – den 10 00-ge deıin 8 jol apaty tirkeldi. «Biz barlyq júrgizýshiler men jaıaý júrginshilerdi jalpyǵa ortaq erejelerdi saqtaýǵa shaqyramyz. Búgin tańnan beri Almatyda 8 jol-kólik apaty tirkeldi»,- dep habarlady polıtsııadan.
Eske salaıyq, 7 aqpan túngi 02.00-den bastap Almaty qalasynda qar jaýa bastady.
Tańǵy saǵat 07.00-degi jaǵdaı boıynsha qalada 3-5 sm, taý bókteri men taýly aýdandarda – 10-12 sm qar tústi. Kóktaıǵaqtyń aldyn alý maqsatynda joldarǵa qum, tuz sebilip jatyr.
