Almatyda qol dobynan jas qyzdar arasynda 11-shi Azııa chempıonaty ótedi
ALMATY. 12 qyrkúıek. QazAqparat /Názıra Eleýhan/ - Almatyda 14-20 qyrkúıek aralyǵynda «Dostyq» sport kesheninde 21 jasqa deıingi qyzdar arasynda qol dobynan 11-shi Azııa chempıonaty ótedi.
Oǵan Azııa elderiniń 8 komandasy qatysady. «A» tobynda Japonııa, Qazaqstan, Taıpeı, Ózbekstan; «V» tobynda Koreıa, Qytaı, Gongkong, Iran memleketteriniń qurama komandalary ózara synǵa túsedi.
Alǵashqy oıyndar 14-15 qyrkúıek kúnderi «Dostyq» sport kesheninde bastalady. Jarystyń saltanatty ashylýy 16 qyrkúıek kúni saǵat 17.00-de Balýan Sholaq atyndaǵy sport saraıynda ótedi.
Birinshi kúni Qazaqstan men Ózbekstan komandalary oınaıdy, ekinshi kúni Qazaqstan komandasy Taıpeı eliniń qyzdarymen synǵa túsedi.
Azııa chempıonatynda 1-4 oryndardy ıemdengen komandalarǵa 2012 jyly Chehııada ótetin Álem chempıonatyna joldama beriledi.
