Almatyda qoqys jáshikteri tegin taratylýda
NUR-SULTAN. QazAqparat – Almatyda Almaly aýdanynda jeke turǵyn úı ıelerine qoqys jáshikteri tegin úlestirlip jatyr, dep habarlaıdy Almaty.tv.
Aýdanda 3500-ge jýyq jeke turǵyn úı tirkelgen. Onyń ishinde 800 nysan kásipkerlerge tıesili. Qazir demeýshilerdiń kómegimen 1500 qoqys jáshigi satyp alynǵan. Jergilikti jurtqa ony taratý jumysy bastalyp ketti.
«Osy kúnge deıin aýdanda qoqys aptasyna bir ret shyǵarylǵan bolsa, biz myna «Tártip» AQ basshylyǵymen kelisip aýdanymyzdaǵy osyndaı qatty qaldyq shyǵarýdy aptasyna eki ret uıymdastyryp jatyrmyz», – dedi Almaty qalasy Almaly aýdany ákiminiń orynbasary Arhat Omarov.
Qala turǵyndary bul bastama tazalyqqa jol ashady dep esepteıdi.
«Qoqysty aptasyna bir ret qana alyp ketetin. Turmystyq qaldyqtardy polıetılen paketpen shyǵaratynbyz. Kóshede ıtter ony shashyp tastap, barlyǵy jaıylyp ketetin», – deıdi bir turǵyn.
«Buǵan deıin qoqysty sársenbi kúni túnde, ne bolmasa beısenbi kúni tańerteń esik aldyna qoıyp qoıatynbyz. Aptasyna eki ret alyp ketip júrse, ol bárimizge qolaıly. Onyń ústine mynadaı qoqys jáshikterin tegin berdi. Barlyǵy endi jınaqy bolyp, kóshede tazalyq saqtalady», – dedi ekinshi biri.
