Almatyda qoqys suryptaý kesheniniń qurylysy bastaldy
ALMATY. QazAqparat - Almatyda qoqys suryptaý kesheniniń qurylysy bastaldy. Búgin qala basshysy Baýyrjan Baıbek nysan qurylysy barysymen tanysty, dep habarlaıdy QazAqparat tilshisi.
Jańa nysan eýropalyq jabdyqtarmen jabdyqtalady. Ekonomıkalyq esepteýlerge sáıkes, kompanııanyń óndiristik qýaty Almaty qalasynyń qajettiligin tolyǵymen óteıdi.
Qaldyq suryptaý kesheniniń qurylysy «Green Recycle» JShS jeke ınvestıtsııasy esebinen júzege asyrylady.
Suryptaý barysynda qaıta paıdalanýǵa jaramdy komponentter tańdalady.
Jylyna 550 myń tonna qoqys óńdeıtin zaýyt 2018 jyldyń jazynda paıdalanýǵa berilmek.
Almaty ákiminiń aıtýynsha, tutastaı alǵanda qaldyqtardy suryptaý kesheniniń paıda bolýy ónerkásiptiń damýyna serpin beredi jáne qaladaǵy ekologııalyq jaǵdaıdy jaqsartady.
«Memleket basshysy qala ekologııasy máselesine erekshe nazar aýdarady. Almaty qalasynyń damý boıynsha sońǵy kezdesýinde Memleket basshysy qoqys problemasyn júıeli túrde sheshý, ony keshendi óńdeýdi jáne paıdalanýdyń tolyq tsıklin qamtamasyz etý qajettigin atap ótti. Zaýyttyń qurylysy biz úshin basym joba bolyp tabylady, bul EKSPO-2017 maqsattary men mindetterine sáıkes keletin mańyzdy baǵyt. Qazir biz birinshi kezekte qoqysty iriktep, odan keıin ony qaıta óńdeýge múmkindik beretin júıeni quryp jatyrmyz», - dedi qala ákimi.
Almaty qalasynyń ákimi jumys saparynyń aıasynda Alataý aýdanynda ornalasqan Indýstrıaldy aımaqtyń jumysyn tekserdi. Búgingi tańda Indýstrıaldy aımaqta jalpy quny 191 mlrd teńge bolatyn 40 joba tirkeldi. Qala ákimdigimen ındýstrıaldy aımaqtardy jańa jobalarmen toltyrýdy arttyrý boıynsha jumystar júrgizip jatyr.
«Bıznestiń jol kartasy - 2020» baǵdarlamasy QR Prezıdentiniń «Jańa onjyldyq - Jańa ekonomıkalyq órleý - Qazaqstannyń jańa múmkindikteri » atty Qazaqstan halqyna Joldaýyn jáne Qazaqstannyń 2020 jylǵa deıingi startegııalyq damý josparyn iske asyrý úshin ázirlengen bolatyn. Baǵdarlama 2014 jylǵa deıingi Memlekettik údemeli ındýstrıaldy-ınnovatsııalyq damytý baǵdarlamasyn iske asyrý mehanızmderiniń biri boldy.
Qazir baǵdarlamanyń 2-kezeńi júzege asyrylyp jatyr.
Sondaı-aq, «Almaty-2020» damý baǵdarlamasyna
sáıkes 2020 jylǵa deıin káriz tazartý úı-jaılarynyń uıyqty alańqaılarynda bıogaz óńdeý boıynsha qoqysóńdeýshi keshenniń jobasyn bekitý, keshen qurylysynyń qarjylandyrý kózderi men syzbasyn kelisý, jylyna TBO 300 myń tonna joba kúshimen Keshen qurylysyn salý, keshen qyzmetiniń nátıjesin monıtorıngileý boıynsha talaptardy qalyptastyrý, Almaty qalasynyń Alataý aýdanynda qaldyqtardy suryptaý kesheniniń (QSK) qurylys, jeke ınvestorlar qarajaty esebinen qaldyqtardy órteıtin kúshi 650 myń tonnany quraıtyn zaýyttyń qurylys úderisine ákimshilik qoldaý kórsetý (Qarasaı polıgonynda), qoqysty bólshektep jınaý men suryptaý kontseptsııasyn jasaýǵa satylaı kóshý, qaýipti jáne basqa da qaldyqtardy kádege jaratý, kómý, jınaý monıtorıngi boıynsha ádisteme ázirleý qarastyrylǵan.
