Almatyda «Kóktemniń qaıyrymdy aptasy» aktsııasy bastaldy

ALMATY. Mamyrdyń 4-i. QazAqparat /Ádilet Musahaev/ - Búgin «Nur Otan» HDP-nyń «Jas Otan» Jastar qanaty men Almaty qalasy Almaly aýdanynyń ákimdigi birigip Uly Jeńistiń 65-jyldyǵyna oraı «Kóktemniń qaıyrymdy aptasy» aktsııasynyń ashylǵandyǵyn jarııalady,

dep habarlaıdy QazAqparat.

Uıymdastyrýshylar atalmysh sharany Álııa men Mánshúk eskertkishine gúl shoqtaryn qoıýmen bastady. Mamyrdyń 4-9-y aralyǵynda ótetin aktsııa barysynda 920 «Jas Otan» músheleri aýdandaǵy 449 soǵys ardageriniń turǵylyqty jerlerin tazalaý, azyq-túlik, dári-dármekpen qamtamasyz etý, kommýnaldyq tólemderdi tóleý sııaqty taǵy basqa sharýalaryn oryndap, qamqorlyq kórsetetin bolady.

Sondaı-aq shara aıasynda B.Momyshuly atyndaǵy áskerı-kásiptik mekteptiń sarbazdary Álııa men Mánshúk eskertkishin Mamyrdyń 9-na deıin qaraýyldap, merekelik kúnderi qurmetti eske alý kezekshiligin oryndaıtyn boldy.

Almaly aýdanynyń ákimi Marat Pirinbekov jıylǵan jurtty Uly Jeńistiń 65-jyldyǵymen quttyqtap, óziniń izgi tilegin bildirdi.

«Mamyrdyń 9-na arnalǵan kóptegen sharalar ótýde. Al búgingi aktsııa 2-3 jyldan beri jalǵasyp kele jatqan dástúrli shara. Osy meıramnyń aldynda aýdanymyzda turyp jatqan soǵys ardagerleriniń úılerine baryp, jyly iltıpat bildire otyryp jastarǵa jaqsy tálim-tárbıe bersek degen maqsatta osy sharany uıymdastyryp otyrmyz», deıdi aýdan ákimi.