Almatyda kóktaıǵaqqa qarsy jańa tehnologııa qoldanyldy
ALMATY. QazAqparat - Almatyda bir táýlik ishinde jaýǵan qardyń qalyńdyǵy 15 santımetrge jetti. Bul týraly búgin Almaty qalasy ákiminiń baspasóz qyzmetinen habarlady.
«Almatyda 9 aqpan kúni tańerteńgi saǵat 08:30-da qar jaýa bastady. Al, 10 aqpan kúni tańerteńgi saǵat 07:00-ge qaraı, taý eteginde qardyń qalyńdyǵy 25 santımetr, al qalada 15 santımetrge jetti.
Kommýnaldyq qyzmetter tarapynan eki ret jol tazalaý jáne qum aralas hlor qospasyn sebý jumystary júrgizildi», - delingen habarlamada.
Ál-Farabı dańǵyly, Dostyq dańǵyly, Saın kóshesi, Fýrmanov kóshesi, Abaı dańǵyly, Abylaı han dańǵyly, Jeltoqsan dańǵyly, jáne Naýryzbaı kóshesi boıynsha kóktaıǵaqqa qarsy ylǵaldandyrǵyshy bar reagentter sebýdiń jańa tehnologııasy qoldanyldy.
Barlyǵy 7056 tonna qum aralas hlor qospasy men 244 tonna tehnıkalyq tuz paıdalanyldy.
Búgin tańerteń saǵat 09:00-den bastap, qala syrtyna jappaı túrde qar shyǵarý jumysy uıymdastyrylady.
Qar tazalaý jumystaryna 668 arnaıy tehnıka jumyldyryldy. Olardyń ishinde qum sepkish tehnıkanyń sany - 112, al trotýar tazalýshy tehnıkanyń sany - 75. Sondaı-aq, qar tazalaý jumystaryna 910 jumysshy qatysty.
«Qazgıdromet» RMK boljamy boıynsha qar búgin kúni boıy jaýady.
Sondaı-aq, búgin tańǵy saǵat 09:00-den bastap, aýdandyq ákimdikterdiń uıymdastyrýymen zańdy tulǵalar óz aýmaǵyn jáne avtoturaqtaryn qardan tazartý jumysyna kirisedi.
