Almatyda kóktaıǵaqqa qarsy 3 myń tonnaǵa jýyq qospa shashyldy

ALMATY. QazAqparat – Almatyda sársenbi kúni saǵat 12-den 17 qarasha, tańǵy saǵat 6-ǵa deıin qala ishinde – 8-10 sm, taý bókterinde 16 sm-ge deıin qar jaýdy, dep habarlaıdy QazAqparat tilshisi.

Almaty ákimdiginiń baspasóz qyzmetinen málim etkendeı, kóktaıǵaqtyń aldyn alý maqsatynda kommýnaldyq qyzmetter joldarǵa 2856 tonna qum men tuz qospasyn shashyp shyqty.

Qar kúreýge túngi kezeńde 414 tehnıka, onyń ishinde 126 qumshashqysh, sondaı-aq 379 jol jumysshysy jumyldyryldy. Búgin tańerteń qala kóshelerine 452 tehnıka men 1280 jumysshy shyqty.

Aýdan ákimdikteri men qala ákimdiginde qar kúreýdi baqylaý boıynsha táýlik boıǵy kezekshilik uıymdastyryldy.

Qazgıdromet boljamyna sáıkes, búgin kúndizgi ýaqytta jaýyn-shashyn bolmaıdy. Aýa temperatýrasy kúndiz – 0...+2 gradýs.

«Qardyń túsýine jáne aýa temperatýrasynyń tómendeýine, tumanǵa, joldar men trotýarlardaǵy aýa ylǵaldylyǵynyń joǵarylaýyna baılanysty kóktaıǵaq, muz paıda bolady dep boljanýda. Júrgizýshilerdi apattar qaýpiniń joǵarylaýyna baılanysty jyldamdyqty tómendetýge, avtomobılder arasyndaǵy qashyqtyqty arttyrýǵa jáne manevr jasaýdan aýlaq bolýǵa shaqyramyz. Jaıaý júrginshilerden trotýarlarda júrgende abaı bolýdy, shuǵyl qajettiliksiz úıden shyqpaýdy suraımyz»,- delingen habarlandyrýda.