Almatyda kóktaıǵaq: 100-ge tarta kólik soǵyldy
ALMATY. QazAqparat Almatyda kóktaıǵaq saldarynan bir táýlik ishinde 100-ge tarta jol apaty oryn aldy. Bul týraly qalalyq ІІD baspasóz qyzmeti habarlady.
Aıta ketý kerek, ońtústik astanada kesheden beri jaýǵan qar áli tolastamady.
«Búgin kúndizgi 12:00-ge deıin 96 jol apaty oryn alǵan. Kóbine kóktaıǵaq pen qalyń qardyń kesirinen bolǵan. Abyroı bolǵanda adam ólimi joq. 16 adam jeńil jaraqat alǵan. Aýa raıy ashyq bolsa da táýligine 100-ge jýyq jol apaty bolady», - dedi ІІD baspasóz hatshysy Saltanat Ázirbek.
Kesheli beri tolassyz jaýǵan qardyń qalyńdyǵy qazir 20 santımetrge jetti.
«Almatyda 9 aqpan kúni tańerteńgi saǵat 08:30-da qar jaýa bastady. Al, 10 aqpan kúni tańerteńgi saǵat 07:00-ge qaraı, taý eteginde qardyń qalyńdyǵy 25 santımetr, al qalada 15 santımetrge jetti. Kommýnaldyq qyzmetter tarapynan eki ret jol tazalaý jáne qum aralas hlor qospasyn sebý jumystary júrgizildi», - dedi qalalyq Tabıǵı resýrstar jáne tabıǵatty paıdalaný basqarmasynan.
Ál-Farabı dańǵyly, Dostyq dańǵyly, Saın kóshesi, Fýrmanov kóshesi, Abaı dańǵyly, Abylaı han dańǵyly, Jeltoqsan dańǵyly, jáne Naýryzbaı kóshesi boıynsha kóktaıǵaqqa qarsy ylǵaldandyrǵyshy bar reagentter sebýdiń jańa tehnologııasy qoldanyldy.
Barlyǵy 7056 tonna qum aralas hlor qospasy men 244 tonna tehnıkalyq tuz paıdalanyldy.
Búgin tańerteń saǵat 09:00-den bastap, qala syrtyna jappaı túrde qar shyǵarý jumysy uıymdastyrylady.
Qar tazalaý jumystaryna 668 arnaıy tehnıka jumyldyryldy. Olardyń ishinde qum sepkish tehnıkanyń sany - 112, al trotýar tazalýshy tehnıkanyń sany - 75. Sondaı-aq, qar tazalaý jumystaryna 910 jumysshy qatysty.
«Qazgıdromet» RMK boljamy boıynsha qar búgin kúni boıy jaýady.
