Almatyda kók bazar men saýda ortalyqtarynda «Ashyq» júıesi qoldanyla bastady
ALMATY. QazAqparat - Almaty qalalyq saýda jáne oıyn-saýyq ortalyqtary men kók bazar «Ashyq» qosymshasy boıynsha jumys júrgize bastady. Bul týraly sanıtarlyq-epıdemıologııalyq baqylaý departamenti basshysynyń orynbasary Sádýaqas Baıǵabylov málimdedi, dep habarlaıdy QazAqparat tilshisi.
«Búginnen bastap Almatyda kók bazar, «Mega Center Plus» SOO, «Esentaı» SOO, «Dostyk Plaza «SOO jáne «Adem» saýda úıi Ashyg jobasy boıynsha testiden ótip jatyr. Atalǵan nysandardyń barlyǵynyń kireberisterinde QR kodtar ornatylǵan. Atap aıtqanda, kók bazarǵa kiretin jerler sany 14-ke deıin qysqartyldy, kelýshiler aǵynyn shekteý úshin QR kodtary bar taqtaıshalar men tosqaýyl lentalary ornatyldy. Qyzyl nemese sary mártebesi bar turǵyndar anyqtalǵan jaǵdaıda, olarǵa kirýge tyıym salynady», - dedi S.Baıǵabylov.
Sondaı-aq Óńirlik kommýnıkatsııalar qyzmetinde ótken brıfıng barysynda qalanyń bas memlekettik sanıtarlyq dárigeri Jandarbek Bekshın balalardyń saýda nysandaryna kirgizbeı qoıýy múmkin be, olar «Ashyq» qosymshasyn paıdalanbaıdy ǵoı, degen saýal qoıylǵan bolatyn.
Bul rette J.Bekshın «biz balalardy qalaı jibermeımiz? Ondaı joq. Qazir kók bazar Ashyq júıesi qoldanylatyn nysandardyń biri retinde qarastyrylýda. Balalar bazarlarǵa barýyna shek qoıylmaıdy», - dedi.
