Almatyda «Kók bazar» aýmaǵyndaǵy kólik qoıatyn oryndar keńeıtildi

 Bul týraly búgin «Almaty spetsparkıng servıs» JShS habarlady.

«Almatynyń biryńǵaı avtomattandyrylǵan aqyly avtoturaq júıesi aımaǵyna taǵy 108 kólik qoıatyn oryn qosyldy. «Kók bazar» aýmaǵy, ıaǵnı Maqataev kóshesiniń boıyndaǵy (Pýshkın men Qaldaıaqov kósheleriniń aralyǵy) kólik qoıatyn keńistik odan ári keńeıtildi», - delingen habarlamada. 

Osylaısha, «Kók bazar» aýmaǵyn avtomattandyrylǵan aqyly avtoturaq júıesimen qamtý jumystary jalǵasýda. Avtoturaq keńistigi operatorynyń málimdeýinshe, avtokólik júrgizýshileriniń kópshiligi parkomat arqyly esep aıyrysýdy meńgerip aldy.     

«Almaty spetstehparkıng servıs» JShS iske kiriskeli kúni búginge deıin kólik qoıatyn 425 orny bar bes avtoturaqty  paıdalanýǵa berdi. Jobany ázirleýshiler júıeni paıdalanýshylar úshin alǵashqy nıettestik baǵdarlamasyn júzege asyrdy. Mobıldi qosymshany tirkegenderge kólikti avtoturaqqa tegin qoıýǵa 1200 saǵat berildi.  Aktsııaǵa 600-ge jýyq avtoáýesqoılar qatysty. Olardyń árqaısysyna kólikti avtoturaqqa tegin qoıýǵa 2 saǵattyq ýaqyt berildi.

«Biz nıettestik baǵdarlamasyn turaqty túrde júzege asyryp otyramyz. «Almaty spetsparkıng servıs» kompanııasy paıdalanýshylardyń avtoturaqtyq shotyndaǵy toltyrylǵan kez kelgen somany 50 paıyzǵa arttyrady», - dedi «Almaty spetstehparkıng servıs» JShS tehnıkalyq jetekshisi Roman Nalepov.

Aktsııa 16 tamyzdan 1 qyrkúıekke deıin uzartyldy. Aqyly avtoturaqtyń bir saǵaty - 100 teńge turady. Alǵashqy 15 mınýt - tegin.