Almatyda kógershinder neden ólgeni anyqtalyp jatyr
NUR-SULTAN. QazAqparat – Almatyda kógershinderdiń neden qyrylǵany anyqtalyp jatyr. Bul týraly Ekologııa, geologııa jáne tabıǵı resýrstar mınıstrligine qarasty Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet málim etti, dep habarlaıdy QazAqparat tilshisi.
«Búgin bizge Almatydaǵy 28 gvardııashyl-panfılovshylar saıabaǵynda jansyz jatqan ári álsirep qulaǵan kógershinderge qatysty foto men vıdeo materıaldar kelip tústi. Oqıǵanyń mán-jaıyn anyqtaý úshin Almaty oblysy boıynsha orman sharýashylyǵy jáne janýarlar dúnıesi ınspektsııasynyń mamandary jaýapty memlekettik organdarmen birlesip, kógershinderdi tekserý úshin laborotorııalyq zertteý júrgizgeli jatyr», - dep jazdy Sáken Dildahmet Facebook -tegi paraqshasynda.
Komıtet ókili qustardyń qyrylý sebebi zertteýden keıin ǵana jarııalanatynyn málim etti.
Aıta ketsek áleýmettik jelige taraǵan óli qustarǵa qatysty ártúrli boljam aıtylyp jatyr. Keıbir qoldanýshy kógershinderdiń ólimin qalada júrgizilgen dezınfektsııalyq jumystarmen baılanystyrýda.
