Almatyda qoǵamdyq tártip saqtaýda 4 myńnan astam qoǵamdyq kúzetshi qyzmet etedi
ALMATY. Tamyzdyń 17-si. QazAqparat /Erbol Turymbetov/ - Qoǵamdyq tártipti qadaǵalaýda polıtsııa qyzmetkerlerine kómek kórsetýge ótinish berýshiler kóbeıýde. Olardyń sany búginde 4 myńnan asyp otyr, dep habarlaıdy Almaty qalalyq ІІD-niń baspasóz qyzmeti.
Qoǵam men polıtsııanyń ózara tyǵyz qarym-qatynasynyń bir kórinisi - qoǵamdyq kúzetshilerdi jumystan bos kezde qoǵamdyq tártipti saqtaýǵa tartý.
«Elbasymyz qoǵamdyq tártipti saqtaýda, azamattardyń quqyqtary men azattyǵyn qorǵaýda jáne qylmys pen zań buzýshylyqtarmen kúresýdegi quqyq qorǵaý organdarynyń eren eńbegin talaı ret aıtqan. Biz osy baǵytta qoǵamdyq kúzetshilerdi tártip saqtaýda kóptep tartýdamyz. Kóptegen buzaqylyqtardy ashýda, ásirese, kóshe buzaqylyqtaryn ashýda qoǵamdyq kúzetshiler úlken jumys atqarady. Sonyń nátıjesinde, qazirge deıin 10 shaqty qylmyskerdi quryqtaý áreketteri sol kúzetshilerdiń arqasynda iske asyp otyr», dedi memlekettik kúzet qyzmeti bastyǵy podpolkovnık Baýyrjan Saparbekov.
Qazir qala boıynsha 700-den astam kúzet ortalyqtary jumys isteıdi. Onda 13 myńnan astam kúzetshi qyzmet etedi. Qala ákiminiń hattamalyq tapsyrmasyna saı ІІD «Qaýipsiz qala» baǵdarlamasy jasaldy. Bul baǵdarlama aıasynda 752 úı qaraýǵa alynyp, ol úshin kúzet fırmalarynyń 1500 qyzmetshisi qyzmet etýde. Aǵymdaǵy jylda tártip saqtaýǵa 520 kúzet uıymdary jumyldyrylǵan. Patrýldik qyzmetke 6 myńnan astam kúzetshiler, onyń ishinde polıtsııa kómekshileri de atsalysqan.
Jyl basynan beri kúzetshiler qyzmetiniń arqasynda 225 qylmystyń beti ashylyp, 2 myńnan astam adam ustalyp, ishki ister oryndaryna tapsyrylǵan.
