Almatyda qoǵamdyq tamaqtanýdyń jeti nysanynda adamdar ýlanǵan
ALMATY. QazAqparat - Almatylyqtar jeti qoǵamdyq tamaqtaný nysanynda, sonyń ishinde Hardee's fast-fýd jelisinde ýlanǵan. Bul týraly Óńirlik kommýnıkatsııalar qyzmetiniń alańynda Almaty qalalyq qoǵamdyq densaýlyq saqtaý departamentiniń (QDSD) basshysy Aızat Moldaǵasymova málimdedi, dep habarlaıdy QazAqparat tilshisi.
Almaty QDSD basshysynyń deregi boıynsha, jeti ýlaný jaǵdaıy «Terrasa», «Ýzbechka», Tsensazııa» dámhanalarynda, «Laǵmanhana №1» ashanasynda «Almaty roll» jetkizý ortalyǵynda, býfette jáne Dostyk Plaza saýda ortalyǵyndaǵy «Hardee's» jyldam tamaqtaný fast-fýd jelilerinde bolǵan.
«Tekserý nátıjeleri boıynsha, atalǵan nysandarda tamaqty ázirleý tehnologııasy saqtalmaǵany anyqtaldy. Olar azyq-túlikti durys saqtamaǵan jáne qaıdan satyp alynǵany belgisiz», - dedi Aızat Moldaǵasymova.
Soǵan qaramastan vedomstvo basshysy azyq-túliktik toksıkoınfektsııanyń 26%-ǵa tómendegenin atap ótti. Byltyr 68 jaǵdaı tirkelse, bıyl 53 bolǵan.
Almaty QDSD-ǵa 303 shaǵym tússe, sonyń 63-i azyq-túlik sapasyna baılanysty bolǵan.
«Onyń ishinde 18 shaǵym tamaqty sapasyz daıyndaýǵa baılanysty túsken. 4 jaǵdaıda shybyn-shirkeıler jáne belgisiz zattar tabylǵan. Olardyń ishinde «Optovyı klýb» JShS gıpermarketi, «Laǵmanhana №1» ashanasy, «PerekýSıtı Mıks», «Mysato» dámhanalary bar», - dep túsindirdi vedomstvo basshysy.
Anyqtalǵan zań buzýshylyqtar boıynsha 2 mln 669 myń teńge somasyna aıyppul salynyp, 65 uıǵarym berilgen. 6 materıal ákimshilik jáne ekonomıkalyq sotqa berildi. Jalpy, 2018 jyly Almatyda 3582 nysan tekserilgen.
