Almatyda qoǵamdyq oryndarda urlyq jasaýmen aınalysqan 20 jáne 22 jastaǵy jigitter ustaldy
ALMATY. 23 qarasha. QazAqparat /Erlik Erjanuly/ - Almatyda polıtsııa qyzmetkerleri iri saýda úıleri, dúkender, dámhana jáne basqa da halyq kóp shoǵyrlanǵan keshenderde urlyqpen aınalysqan urylardy ustady. Olar qolaıly sátti paıdalanyp kelýshilerdiń qaltalary men sómkelerinen ámııandaryn, sonymen qatar uıaly telefondaryn urlaýmen aınalysqan.
«Sábıt, Jánibek esimdi 20 jáne 22 jastaǵy bul jigitter ózderiniń sońǵy qylmysyn Gogol kóshesiniń boıynda ornalasqan dámhanalardyń birinde jaqyn mańda ornalasqan oqý ornynyń eki stýdenti tańǵy asyn iship otyrǵan kezde jasaǵan. Olar eshkimge baıqatpastan oryndyqtyń arqalyǵynda ilýli turǵan 316 myń teńge turatyn fotoapparaty bar sómke men jábirlenýshiler 115 myń teńgege baǵalaǵan flesh-kartany jymqyryp ketpek bolǵan», - deıdi Medeý aýdandyq Іshki ister basqarmasynyń bastyǵy Baqyt Qasabekov. Onyń aıtýynsha, stýdentter zattarynyń joǵalǵanyn 10 mınýt ótken soń ańǵaryp, birden polıtsııaǵa habarlaıdy. Oqıǵa ornyna kele jatqan tártip saqshylarynyń nazaryn joldyń shetinde júgirip bara jatqan eki jigitti kóredi. Patrýldik ekıpaj qyzmetkerleri birden olardy toqtatyp, tekserýdi uıǵarady. Alaıda polıtseılerdi kórgen urylar urlaǵan sómkeni ishindegi barlyq zattarymen qosa laqtyra salyp, bet-betimen qashady. Іzge túsýdiń nátıjesinde kúdiktilerdi quryqtaldy. Áshkerelengen qylmyskerler qutylmaqshy bolǵan aıǵaq zattar protsessýaldyq negizde jedel-tergeý tobymen tárkilendi.
«Jábirlenýshiler óz zattaryn tanyp, mindetti tergeý is-sharasy júrgizilgennen keıin ıesine qaıtaryldy. Bul aralyqta, ustalǵandardyń ekeýi de aýdandyq ishki ister basqarmasyna jetkizilip, sol kúni-aq tergeýshilermen bótenniń múlkin urlaý faktisi boıynsha qylmystyq is qozǵaldy. Buryn olardyń eshqaısysy qylmystyq jaýapkershilikke tartylmaǵan Jánibek Ońtústik Qazaqstan oblysynyń týmasy bolsa, onyń serigi Almaty oblysynyń Іle aýdanynan bolyp shyqty», deıdi qalalyq ishki ister departamentiniń baspasóz qyzmetiniń ınspektory Gúlnar Jamanqulova.
