Almatyda qoǵamdyq medıtsınalyq keńes quryldy
ALMATY. QazAqparat – Almaty qalasynyń ákimi Baqytjan Saǵyntaevtyń tapsyrmasy boıynsha megapolıste Qoǵamdyq medıtsınalyq keńes quryldy, dep habarlaıdy QazAqparat tilshisi.
Almaty qalasynyń ákimi Baqytjan Saǵyntaevtyń tapsyrmasyn oryndaý aıasynda, sondaı-aq, densaýlyq saqtaý mınıstri Eljan Birtanov belgilegen medıtsınalyq qaýymdastyqpen ózara árekettestik júıesin qurý jónindegi nusqaýyna sáıkes shahar basshysynyń orynbasary Erjan Babaqumarovtyń basshylyǵymen Almaty qalasynyń Qoǵamdyq medıtsınalyq keńesi quryldy
Keńestiń quramyna medıtsınalyq qaýymdastyqtardyń shamamen 140 jetekshi profıldi sarapshylary men ókilderi kirdi. Olardyń qatarynda «Akýsherııa, gınekologııa jáne perınatologııa ǵylymı ortalyǵy» AQ táýelsiz dırektory Aıda Áljanova, TRIZ-fasılıtator, halyqaralyq akkredıtatsııalanǵan medıator Irına Vıgovskaıa, «Almaty klınıkalary qaýymdastyǵy» JKjZTB atqarýshy dırektory Rasýl Dúısenov, Qazaqstandyq reprodkýtıvti medıtsına qaýymdastyǵynyń prezıdenti, joǵary sanatty akýsher-gınekolog dáriger Vıacheslav Lokshın, A.N.Syzǵanov atyndaǵy «Ulttyq ǵylymı hırýrgııa ortalyǵy» AQ basqarmasynyń tóraǵasy Bolatbek Baımahanov, sonymen birge, respýblıkalyq medıtsınalyq ortalyqtardyń, memlekettik jáne jekemenshik uıymdardyń, medıtsınalyq ýnıversıtetterdiń, qalalyq densaýlyq saqtaý basqarmasy men taýarlar men qyzmetterdiń sapasyn baqylaý departamentiniń ókilderi bar.
Keńestiń mindeti – aǵymdaǵy jaǵdaıǵa taldaý jasaı otyryp, Almaty qalasynyń densaýlyq saqtaý júıesin damytý boıynsha sharalardy jasap shyǵarý. Keńes qurylymynda úsh jumys toby quryldy: dárigerler arasynda vırýs juqtyrýdyń aldyn alý, qazirgi medıtsına uıymdarynyń jumysy, Almaty qalasynda densaýlyq saqtaý júıesiniń postkrızıstik damý strategııasy.
«Memleket basshysy atap ótkendeı, aldaǵy (bolashaqtaǵy) daǵdarysqa daıyndyqty qamtamasyz etýde densaýlyq saqtaý júıesin jańǵyrtyp, qoıylǵan mindetterdiń basymdyǵyn qaıta qaraý úshin jańa bastamalardy qolǵa alýymyz kerek. Qoǵamdyq medıtsınalyq keńestiń maqsaty – Almaty qalasy densaýlyq saqtaý júıeisiniń postkrızıstik damýy úshin qajetti sharalar paketin jasap shyǵarý. Jańa tásilder medıtsınalyq qyzmet kórsetýdiń joǵary sapasyn qamtamasyz etýge, qalalyq medıtsınalyq qoǵamdastyqtyń azamattardyń densaýlyǵyna qatysty jaǵdaılarda tez áreket etýge,sonymen birge, áldeqaıda keń taraıtyn aýrý túrlerine qaraı baǵyttalatyn bolady», – dep atap ótti E.Babaqumarov.
Kezdesý barysynda medıtsına qyzmetkerleriniń eńbek qaýipsizdigin qamtamasyz etý jáne olardyń koronavırýs ınfektsııasyn juqtyrý qaýpinen qorǵaý tásilderi qarastyryldy. Jekeleı alǵanda, medıtsına qyzmetkerleriniń jeke qorǵanysh quraldary sapaly testtermen qamtylýyn jáne koronavırýsty tekserýde zerthanalyq zertteýlerdi jaqsartý jaıy da sóz boldy.
Keńes músheleri tarapynan memlekettik jáne jekemenshik medıtsınalyq uıymdardyń jumys tıimdiligin arttyrý, jumys barysyn jetildirý, medıtsınalyq qyzmetterge qoljetimdilikti arttyrý, halyqpen jáne qalanyń ishki medıtsınalyq qoǵamdastyqtarymen baılanysty jaqsartý, sondaı-aq, otandyq medıtsınaǵa degen halyqtyń senimin arttyrý jóninde birqatar usynystar aıtyldy.
«Búgingi tańda medıtsınalyq qyzmetkerleri stresti jaǵdaıda jáne olarǵa artylǵan júk aýyr bolyp otyr. Sol sebepti medıtsına mekemeleriniń barlyq qyzmetkerlerine arnap qashyqtyqtan streske qarsy baǵdarlama jasaý usynysy bar. Bul salada bizde aıtýly mamandarymyz da bar», - dedi TRIZ-fasılıtator, halyqaralyq akkredıtatsııalanǵan medıator Irına Vıgovskaıa.
Almaty klınıkalary qaýymdastyǵy» JKjZTB atqarýshy dırektory Rasýl Dúısenov medıtsına qyzmetkerleriniń vırýs juqtyrý jaǵdaıyn taldaýǵa jiti nazar aýdardy. Bul eńbek qaýipsizdigin qamtamasyz etý jóninde jańa ádisterdi jasaýda, sonymen birge dárigerler arasynda jańadan juqtyrý jaǵdaıyn boldyrmaý úshin kerek ekenin atap ótti.
Óz kezeginde azamattyq belsendi Aıda Áljanova bul bastamanyń Keńes quramyndaǵy árbir músheniń osy iske belsendi qatysýyn qajet etetin, durys ujymdyq sheshim qabyldaýǵa uıytqy bolatyn fasılıtatsııa tehnologııasyn qoldana otyryp jasalatyn jańa jumys formaty ekendigin atap ótti. Barlyq usynystar júıege keltirilip, egjeı-tegjeı tekseriledi. Olardyń negizinde qalanyń medıtsınalyq uıymdaryna arnap daǵdarys kezinde jáne odan keıingi kezeń úshin strategııa qurylmaq.
Otyrys qorytyndysy boıynsha Almaty qalasy ákiminiń orynbasary Erjan Babaqumarov Keńestiń ınstıtýttandyrylatynyn jáne onyń tek koronavırýs ınfektsııasymen kúresý sharalaryn júrgizýmen ǵana emes, karantın aıaqtalǵannan keıin de jumysyn jalǵastyratynyn atap ótti.
«Qoǵamdyq keńes medıtsınalyq qoǵamdastyqpen dıalog qurýdyń yqpaldy tetigine aınalady. Keńestiń qatysýymen tájirıbede júzege asyrýǵa usynylatyn qorytyndy qujattar jasalady», - dep qortyndylady Erjan Babaqumarov.
