Almatyda qoǵamdyq kóliktiń júrý ýaqyty uzartyldy
ALMATY. QazAqparat – Qalalyq avtobýs marshrýttary 21 mamyrdan bastap keshki saǵat 21:00-ge deıin jumys isteıtin bolady, dep habarlaıdy QazAqparat tilshisi.
«Qoǵamdyq kólikterdiń júrý ýaqyty uzartylady. Erteńnen bastap keshki saǵat 21:00-ge deıin júredi. Bul rette jolaýshylar maska taǵý jáne áleýmettik araqashyqtyqty saqtaý sııaqty sanıtarlyq normalardy qatań saqtaǵan jaǵdaıda ǵana qoǵamdyq kólikpen qatynaı alady. Sondaı-aq avtobýs salonyndaǵy jolaýshylar sany otyratyn oryndardan aspaýy tıis», dep habarlady qala ákimdiginiń baspasóz qyzmeti.
Eger otyratyn oryn bolmasa, kelesi avtobýsty kútý kerek. Jolaýshylar aǵynynyń azaıýyna qaramastan, qala turǵyndarynyń yńǵaılylyǵy men kútý aralyǵyn qysqartý úshin qazir avtobýstardyń 90%-y jolǵa shyqty.
Sonymen qatar, sanıtarlyq normalardyń saqtalýyna jolaýshylardyń ózderi jaýapty ekenin atap ótken jón. SES qyzmetkerleri quqyq qorǵaý organdarymen birlesip qoǵamdyq kólikte tekserýler uıymdastyratyn bolady.
Esterińizge sala keteıik, qala mańy baǵdarlarynyń jumysyn qalpyna keltirý ázirge josparda joq.
