Almatyda qoǵamdyq kólikti sýbsıdııalaý tártibin túbegeıli ózgertý qajet- ákimdik
ALMATY. QazAqparat- Almatyda kólik quraldary salasy jaqsy damyǵan, biraq bir-birimen úılestirilmegen. Bul týraly qala ákiminiń orynbasary Asqar Amrın aıtty, dep habarlaıdy QazAqparat tilshisi.
«Almaty joldarynda kún saıyn 700 myń jeńil kólik júredi, onyń ishinde qalanyń tómengi bóliginde júk tıeıtin tranzıt kólikter de bar. Basty problema - Almatydaǵy qoǵamdyq kóliktiń tıimsizdigi. Jolaýshylar tasymalynyń negizgi úlesi avtobýstar men trolleıbýstarǵa tıesili. Bólingen joldardaǵy avtobýstardyń ortasha jyldamdyǵy saǵatyna 25 shaqyrym, jalpy aǵynda saǵatyna 15-17 shaqyrym. Bul jolaýshylarǵa yńǵaısyz jáne kóp ýaqyt alady», - dedi Asqar Amrın.
Onyń aıtýynsha, qoǵamdyq kólikter tehnıkalyq sebepterge baılanysty kúnine 300 ret baǵyttan shyǵyp qalady. Bul - avtobýstardyń jalpy sanynyń 15 paıyzy. Marshrýt jelisi jetkilikti túrde tıimdi uıymdastyrylmaǵan. Qala mańyndaǵy jáne qalalyq qoǵamdyq kólikter arasynda naqty baılanys joq, tasymaldaýǵa yńǵaıly kólik toraptary qarastyrylmaǵan. Baǵyttardyń shamamen 76 paıyzynyń uzyndyǵy 15 shaqyrymnan asady. «Sheshim retinde qoldanystaǵy uzaq baǵyttardyń qashyqtyǵyn qysqartý jáne magıstraldyq baǵyttar jelisin qurý nusqasy qarastyrylýda. Búginde 155-ke jýyq qalalyq baǵyt bar, onyń 146 avtobýs jáne 9 trolleıbýs. Olarǵa kún saıyn 2500 qoǵamdyq kólik qyzmet kórsetedi.
Sonymen qatar ol qoǵamdyq kóliktegi tarıf máselesine toqtaldy. «2012 jyldan beri tarıf ózgergen joq. Bul avtobýspen tasymaldaý shyǵynyn qalyptastyrady. Osy ýaqytqa deıin qala bul aıyrmashylyqty sýbsıdııalap keledi. 2017-2020 jyldarǵa arnalǵan qalalyq bıýdjetten jeke tasymaldaýshylarǵa tólengen sýbsıdııa kólemi 78 mıllıard teńgege jetken edi. Keıingi bir jylda sýbsıdııa kólemi 56 mıllıard teńge boldy. Óskeni kórinip tur»,- dedi qala ákimniń orynbasary. Asqar Amrın azamattardyń avtobýstardy uzaq kútetinine, jelidegi avtobýstardyń turaqtylyǵynyń tómendigine, qyzmet kórsetý sapasynyń nasharlyǵyna jáne kólik parkiniń tozǵanyna jıi shaǵymdanatynyn tilge tıek etti.
«Tasymaldaýshylardy sýbsıdııalaýdyń tarıftik saıasatyn túbegeıli ózgertý qajet. Sýbsıdııalar qyzmet kórsetý sapasyn jaqsartý jáne avtobýs parkin jańartý úshin berilýi kerek. 2023-2025 jylǵa deıin jyljymaly quramdy kezeń-kezeńimen jańartýdy qamtamasyz etemiz. 1000 jańa avtobýs satyp alynady. Sondaı-aq aldaǵy eki jylda trolleıbýs parki jańartylady»,- dep qosty Asqar Amrın.
