Almatyda qoǵamdyq kólikterde jol aqysyn tóleýdiń elektrondy júıesi engiziledi

Bul týraly Almaty qalasynyń jolaýshylar kóligi basqarmasynan habarlady.

«Kóp uzamaı ońtústik astana turǵyndary qoǵamdyq kólikterde jol aqysyn qolma-qol aqshasyz tóleýge múmkindik alady. Aldaǵy jyldyń basynan qalanyń qoǵamdyq kólikterinde jol aqysyn tóleýdiń elektrondy júıesin engizý josparlanýda. Bul jerde tólem quraly - arnaıy plastıkalyq smart-kartalar nemese bank kartochkalary bolýy yqtımal. Ol jaǵy qazir naqtylaný ústinde» - delingen habarlamada.

Bir aıta keterligi, elektrondy kartalar avtobýstarda, tramvaılarda jáne trolleıbýstarda júrýge jaramdy bolmaq. Almaty qalasynyń basshylyǵy osylaısha qolǵa alynyp jatqan jańa júıe arqyly qazirgi tańda qoǵamdyq kólikterde jol aqysyn tóleý barysynda oryn alatyn alaıaqtyq áreketterdi birjola joımaq nıette.