Almatyda qoǵamdyq kólikterde maska rejımin buzǵan myńnan astam jolaýshy anyqtaldy
ALMATY. QazAqparat - Almatyda jarty kún ishinde qoǵamdyq kólikterde myńnan astam jolaýshy maska rejımin buzdy. Bul týraly Almaty qalalyq tsıfrlandyrý basqarmasynyń basshysy Baıan Qońyrbaev aıtty, dep habarlaıdy QazAqparat tilshisi.
Onyń aıtýynsha, qalada 16 baǵyt boıynsha júretin 32 avtobýsta maska rejımin baqylaıtyn beınekamera ornatylǵan.
«Aldaǵy ýaqytta mundaı beınebaqylaý kameralary barlyq qoǵamdyq kólikterde bolady. Adamdardyń maska taǵýyn qadaǵalaıtyn qurylyǵy avtobýstardyń salonyna ornatylady. Osylaısha, maska rejımin buzǵan jolaýshy týraly aqparat ahýaldyq ortalyqqa túsedi, keıin avtobýs júrgizýshisine habarlama keledi»,– deıdi spıker.
Sonymen qatar, qalalyq tsıfrlandyrý basqarmasy qoǵamdyq kólikterde jáne adamdar kóp shoǵyrlanatyn jerde bolatyn urlyqtyń aldyn alý úshin aýqymdy jumystar júrgizýde.
«Osy kameralar arqyly biz kún saıyn taldaý júrgizip, qalada qanshalyqty tártip buzýshylyqtar bolyp jatqanyn kóremiz. Máselen, 20 qarashada qaladaǵy saýda ortalyqtary men dárihanalarda 21615 buzýshylyq anyqtaldy. Jarty kúnde qoǵamdyq kólikterde 3616 zań buzýshylyq boldy. Onyń 1200–i maska rejımin ustamaǵandar»,– dep atap ótti Baıan Qońyrbaev.
