Almatyda qoǵamdyq kóliktegi jolaýshylar sany 80 paıyzǵa azaıdy
ALMATY. QazAqparat – Almatyda qoǵamdyq kóliktegi jolaýshylar sany 80 paıyzǵa azaıdy. Bul týraly Almaty qalalyq Mobıldilik basqarmasynyń basshysy Saǵyndyq Telibaev málim etti, dep habarlaıdy QazAqparat tilshisi.
Onyń aıtýynsha, qalada karantındik tártiptiń engizilýine baılanysty barlyq uıymdardyń jumys ýaqyty qysqardy. Osyǵan oraı qoǵamdyq kólikterdiń jumys kestesi ózgerdi. Avtobýstar keshki saǵat 19.00-ge deıin ǵana júredi. Búgingi kúni jolaýshylar sany 80 paıyzǵa azaıdy.
«Qazir 114 qalalyq marshrýt boıynsha 991 avtobýs jumysqa shyǵyp júr. Bir avtobýsta kúnine jolaýshylar sany 107 adamdy quraıdy. Osylaısha, bir reıstegi jolaýshylardyń ortasha sany 12-13 adamnan aspaıdy. Bul, jolaýshylar úshin qajetti qaýipsiz qashyqtyqty qamtamasyz etýge múmkindik beredi»,– deıdi Saǵyndyq Telibaev.
Sonymen qatar, ol qalaaralyq jáne qala mańyna qatynaıtyn marshrýttardyń jumysy toqtatylǵanyn atap ótti. Olardyń jumysy tótenshe jaǵdaı tártibi aıaqtalǵannan keıin ǵana qalpyna keltiriledi.
«Metropolıten boıynsha jolaýshylar aǵyny 90% tómendedi, demalys kúngi rejımmen jumysy jalǵasyp jatyr. Sońǵy depolarda vagondarǵa dezınfektsııa júrgiziledi», - dep qosty ol.
