Almatyda qoǵamdyq kóliktegi jolaqy baǵasy qymbattaıdy
ALMATY. 22 mamyr. QazAqparat - Búgin Almatyda V shaqyrylymdaǵy qalalyq máslıhattyń V sessııasynda depýttar qoǵamdyq kólikte jolaýshylar men júk tasymaldaýdyń jol aqysyn 80 teńgege kóterý jóninde biraýyzdan sheshim qabyldady.
Alaıda, jeńildikpen satylatyn jol aqysy bıletteriniń quny ózgerissiz qalady. Ol oqýshylar úshin - 850 teńge; stýdentter úshin - 2250 tenge; zeınetkerler úshin - 1500 teńge, al jalpyǵa arnalǵan jol aqysy bıletiniń quny 4500 teńge. Bul baǵa qala mańyna qyzmet kórsetetin Almatydaǵy kásiporyndardyń kólikterinde de saqtalady.
Ákimdiktiń baspasóz qyzmetiniń habarlaýynsha, Almaty qalasynyń jolaýshylar tasymaldaý kásiporyndarynyń qaýymdastyǵy qoǵamdyq kólikte jol aqysy baǵasyn 100 teńgege deıin ósirý jóninde qala basshylyǵyna birneshe ret ótinish jasaǵan. Oǵan - shıkizattardyń, qozǵalmaly quramǵa qajet materıaldardyń, janar maıdyń qymbattaýy túrtki bolǵan. Máselen avtomobıl otyny 88 paıyzǵa, jaǵar maı 104 paıyzǵa, qosalqy bólshekter 64 paıyzǵa, avtorezınalar 89 paıyzǵa, avtobýstarǵa qajetti zattar 40 paıyzǵa, jalaqy kólemi 56 paıyzǵa ósti. Al jolaqy tarıfi sońǵy ret 2008 jyldyń maýsym aıynda ózgergen bolatyn. Jalpy QR «Avtomobıl transporty týraly» Zańy men Jolaýshylardy jáne júkterdi qoǵamdyq kólikte tasymaldaý týraly tarıfter ádistemesine sáıkes jergilikti atqarý organdary ár 3 jyl saıyn qalanyń qoǵamdyq kóliginiń jol aqysyn qaraýǵa quqyly.
